Jamie Spears a bay un biaha mas contra e mocion pa e wordo kita como e voogd di Britney, e biaha aki señalando cu Britney ta asina ‘mentalmente incapacita’, cu nan a considera pa pone bou di control psikiatrico luna pasa. Den e documentonan hudicial, Jamie a revela cu e conservador personal di Britney a bisa na juli, cu su yiu muhe tin un enfermedad mental, el a bisa cu hopi di e reclamacionnan di Britney tocante su tutela ta falso y el a recomenda pa pone bou di retencion psikiatrico 5150. Un retencion 5150 ta detene involuntariamente un adulto pa un evaluacion psikiatrico cu ta generalmente pa 72 ora.
Esaki ta e ultimo di e 13 añanan di tutela y e reciente lucha di Britney ta pa e recupera e control di su bida y su fortuna di 60 miyon di dolar. Segun e documentonan presenta na Los Angeles, Jamie a afirma cu luna pasa el ricibi un yamada telefonico di e conservadora personal di Britney, Jodi Montgomery, cu a keda nombra temporalmente na september 2019. “Durante nos combersacion, Sra. Montgomery a zona hopi angustia y el a expresa con preocupa e tabata pa e comportacion reciente di mi yiu y su salud mental en general”, Jamie a bisa.
Montgomery a splica e tata cu su yiu no tabata tumando su remedinan manera debe ser, y cu e no ta scucha e recomendacionnan di su ekipo medico, y el a hasta nenga pa mira algun di su dokternan. Sra. Montgomery a bisa cu e ta hopi preocupa den e direccion su Britney ta bayendo y directamente a pidi ayudo cu e problemanan aki, segun Jamie Spears.
