E gobernador di New York, Andrew Cuomo, a anuncia awe su renuncia despues cu 11 hende muhe lo a acuse di acoso sexual y conducta inapropia, incluyendo ex miembronan di su staff y un cu ta traha den su staff actualmente. El a bisa den su discurso en bibo cu e ta kere mirando e circunstancianan, e miho manera cu e lo por yuda ta si e hala un banda y laga e gobierno ser gobierno atrobe.
Su renuncia lo bay na vigor den 14 dia. Despues di un investigacion di cinco luna, e procurador general di e estado di New York, Letitia James, a anuncia den un rapport di 168 pagina siman pasa cu e gobernador a participa den un conducta di intimidacion di acoso sexual segun e leynan federal y di e estado di New York.
Cuomo di 63 aña, a nenga e acusacionnan di acoso sexual, pero a señala cu e kier disculpa su mes profundamente, cu cualkier hende muhe cu por a sintie ofendi pa su accionnan. El a bisa cu e ta tabata demasiado informal cu e hendenan, brasando y dunando sunchi casualmente, tanto na e muhe como e hombernan, cu el a haci esaki henter su bida. Cu den su mente nunca el a cruza e linea cu niun hende, pero e no a ripara te na cua punto e linea a ser redibuha.
