E titulo cu Kate Lynn a keda super feliz di a logra tabata “Miss Youth Model Aruba 2019” y despues por a mir’e como modelo di su propio linea di bikini: Kate Blom Swimwear. E idea pa crea su marca di bikini a cuminsa na 2019. Kate y su mama semper tabata obsesiona cu bikini, sinembargo hopi biaha nan tabatin dificultad pa haya un cu ta keda na nan gusto. Nan a pensa, cu e lo ta un bon idea pa crea un marca caminda e clientenan mes por scoge nan style di bikini, y asina ta sigur cu e ta fit bon na nan curpa.
Aunke Kate bay Hulanda dia prome di augustus ultimo pa studia ‘Nursing’ na Hoge School van Amsterdam, e lo sigui cu su linea di bikini mientras e ta studiando na Hulanda. E ta conta cu e ayudo y sosten di su wela y su mama pa nan sigui bende na Aruba, cual e ta hopi agradecido. Pa nan prome coleccion di zomer 2021 a duna cada un di e setnan di bikini un nomber, cu ta representa e bunita beachnan di nos dushi isla. E coleccion tin e setnan cu yama: Arashi, Eagle y Catalina cu ta di un pieza.
Kate Lynn lo sigui ademas di ‘nursing’ un estudio den diseño di moda y ta cla pa e ‘journey’ aki. Por lesa e entrevista y admira e coleccion di Kate Blom Swimwear den edicion di Focus Digital Magazine di augustus, cu ta accesibel ‘gratis’ via Apple Store of Android Google Play Store, cu por download e aplicacion riba un smartphone of tablet.
