Aruba completo ta orguyoso di e seleccionnan di Aruba cu a bay representa nos isla na Santo Domingo den futbol. E team di futbolistanan femenino y masculino hoben, pa prome biaha den historia di nos isla, a logra cu tur dos ekipo a pasa pa final representando Aruba den exterior. E ekipo di mucha muhe di U-14 a titula campeon den e Caribbean Football Challenge Union -CFU Challenge Series y e ekipo di mucha homber a titula sub-campeon.
Aruba Bank ta felicita cada hungado cu e logro historico den representacion di nos isla durante e 10 dianan cu nan tabata na Santo Domingo. Aruba Bank a regalanan un Day-Pass pa disfruta na De Palm Island pa asina nan por celebra nan logro hunto. Un pabien ta bay pa e staf tecnico di ambos seleccion cu a sostene e ekiponan durante full e temporada, y e mayor- y familiarnan pa nan dedicacion y promocion di deporte entre e hobennan.
