E hende muhenan cu a haya covid-19 ta nuestralisa anticurpa contra e virus den e lechi materno te hasta 10 luna despues di e infeccion, segun un investigacion presenta na un conferencia. Rebecca Powell di Hospital Mount Sinai na New York y su coleganan a analisa e muestranan di lechi materno di 75 muhe, cu a recupera di infeccion di covid-19. Nan a descubri cu 88 por ciento di e muestranan tabata contene anticurpa contra e virus SARS-CoV-2 y den mayoria di e casonan tabatin e capacidad di neutralisa e virus.
E investigacionnan presenta na Global Breastfeeding and Lactation Symposium dia 21 di september, a sugeri cu borstvoeding por yuda na proteha e babynan di wordo infecta cu covid-19. Ta conoci cu esaki ta e caso di otro enfermedadnan respiratorio manera influenza y pertussis. Mientras cu e muchanan chikito tin un riesgo menor di covid-19 severo cu e adultonan, alrededor di uno di cada 10 baby bou di un aña ta rekeri cuido hospitalario si nan ta infecta. E anticurpanan extrai di e lechi materno tambe por wordo uza manera un terapia pa e adultonan cu covid-19, segun Rebecca Powell.
For di estudio tambe a haya sa, cu mayoria di e muhenan cu a haya e vacunanan Pfizer/BioNTech of Moderna tambe tabatin anticurpanan specifico contra coronavirus den e lechi materno, pero nan a observa e nivelnan mas abou di anticurpa den e lechi di e muhenan, cu a ricibi e vacuna Johnson & Johnson. Esaki ta respalda e investigacionnan anterior, cu a sugeri cu e vacunanan pa e mamanan cu ta duna lechi di pecho por yuda proteha nan babynan di e infeccion di covid-19, aunke esaki ainda no a ser demostra di un manera concluyente.
Fuente: New Scientist
