Joseph Henriquez y Daniela Ruiz a conoce otro na American Film Institute na Hollywood, unda ambos a sigui nan ‘Masters in Fine Arts in Producing’. Daniela a nace y crece na San Diego y el a wordo lanta pa mayornan mexicano, mientras Joseph a nace y crece na Aruba, y a muda pa Merca ora e tabatin 18 aña. Ambos ta productor di cine y television, cu a ricibi premiacion di e industria cinematografico. Nan ta traha hopi di cerca cu e cineastanan independiente y tambe cu e studionan mas importante. Conhuntamente nan a produci pelicula manera “¡He Matado a Mi Marido!”, protagonisa pa Maria Conchita Alonso y Gaby Espino.
Joseph ta un productor y tambe ‘head of film production’ na SK Global Entertainment. Aunke Jo y Dani ta biba un estilo di bida extremadamente druk, nan ta sigura nan mes pa semper pasa e finnan di siman dibertido hunto. Despues di cuater aña hunto, nan a compromete durante un biahe pa Italia. Pa termina e biahe romantico y memorabel aki, nan a dirigi nan mes pa e cuidad historico di Matera, unda casualmente MGM tabata filmando e pelicula di James Bond, e mesun fin di siman ey. Hollywood ta mustra cu nunca ta demasiado leu di nan dos.
Por lesa full e entrevista, cu ta interesante y alabes dibertido den FOCUS Digital Magazine di october, cu ta accesibel ‘gratis’ via Apple Store of Android Google Play Store, cu por download e aplicacion riba un smartphone of tablet. For di e luna aki tambe e revista ta accesibel via www.focus.aw
