Jamie Lynn Spears a kibra su silencio pa papia di su ruman Britney Spears, y el a bisa cu aunke e ta stim’e, e relacion entre nan dos ta complica despues cu e cantante a haya su libertad. Den un entrevista pa e programa Good Morning America, e actriz di 30 aña a bisa: “E amor pa mi ruman t’ey 100 porciento. Mi ta stima mi ruman. Ami semper a stim’e y apoy’e y mi a haci e miho cu mi por p’e y e sa esey. Mi no sa dicon nos ta den e posicion aki actualmente”. E distanciamento entre nan dos a cuminsa ora Jamie Lynn a publica su buki ‘Things I Should Have Said’, unda cu e ta conta den detaye e situacion cu e Princess di Pop a biba den dje.
Sinembargo, e ta sigura: “Semper mi tabata e apoyo mas grandi di mi ruman, ora e tabata mester yudansa mi tabata t’ey eynan p’e. Mi a haci tur cos posibel pa sigura cu e tin tur e contactonan cu e tabata mester di dje, pa posiblemente sigui dilanti y caba e tutela aki y simplemente caba cu tur esaki pa nos famia”. Aunke e no a revela cua contacto el a duna Britney, el a opina cu si tur esaki a provoca tanto discordia entre nan dos “dicon continua?”. Britney su ruman ta agrega: “Si e tabata kier papia cu otro hende, awel mi lo yude. Ami tabata prepara esey”. E ta sigui; “Incluso mi a papia cu su team legal anteriormente, y esey no a termina bon den mi fabor”.
Ora el a wordo puntra si e tabata na fabor of no di e voogd di su tata, y e manera cu e tabata manda riba su ruman, el a responde: “E no tabata un cuestion si mi ta di acuerdo cu e tutela. Tur hende tin un stem, y e mester wordo scucha”.
