Despues di su hitnan manera “Move Tur Montaña”, “Nunka Entrega” y “Un Brasa So Mi Ke”, awo Shamiro Anita, e cantante di gospel di Corsou, ta bolbe lansa su tremendo cantica y videoclip nobo nobo titula ”Sigui Pa Dilanti”. E mensahe special di Shamiro den e cantica aki ta: maske bo trompica y cay, maske tur speransa mester bay, maske hende lanta contra bo, y maske cu e dolor no tin fin, no stop di persevera, no wak patras y SIGUI PA DILANTI. Paso cu Dios e bataya ta gana y tin un futuro briyante ta warda bo.
Ta trata aki di un cantica cu Shamiro ta lansa, despues cu el a bin ta expande su musica na Spaño riba nivel internacional, cu canticanan manera “No Soy Igual Que Ayer”, “Volare” y “Guiame”. Tur su canticanan na spaño a logra yega te den e top di musica na entro otro Medellin, Colombia y ta hitnan grandi riba Youtube. Den e temponan dificil cu mundo completo a pasa y ta pasando aden, Shamiro su musica ta sigui yuda hopi hende.
E tremendo videoclip di e cantica nobo aki ta motiva y pusha pa lanta para, no entrega, no wak patras y continua, paso awor ta e momento pa “Sigui pa Dilanti”. Shamiro ta gradici Dios na prome luga y tur hende cu ta sostene, wak, scucha, y/of comparti su musica. Su oracion ta pa mas y mas hende rond mundo keda bendiciona pa medio di e mensahenan positivo di Dios den su musica. P’esey su peticion ta pa tur hende sigui comparti su canticanan y videoclipnan cu otro pa asina mas y mas hende rond mundo por “Sigui pa Dilanti”, paso cu Dios e bataya ta gana. E grabacion di e videoclip “Sigui Pa Dilanti” a tuma luga den Sentro Deportivo Kòrsòu (SDK) y Immartial Boxing Ring.
