Despues cu Reina Elizabeth a fayece na edad di 96 aña dia 8 di september, Prince of Wales di 73 aña, a converti inmediatamente den rey. E ta awo oficialmente King Charles III, pero posiblemente su coronacion lo tarda algun luna. (Su mama a subi trono na februari 1952, mientras su coronacion formal no a tuma luga te cu na juni 1953).
Segun un profesor di historia di England’s Reading University y autor di ‘Young Elizabeth: The Making of the Queen’, cu e ceremonia di coronacion usualmente ta dura un aña, pasobra e ta wordo considera inapropia pa haci un ceremonia di coronacion mesora despues di morto di un persona. E ta un periodo largo di rouw segun e profesor Kate Williams.
Aunke na varios ocasion a specula cu Charles por hala un banda pa permiti su yiu, prins William di 40 aña tuma e rienda, no tin niun berdad den e pensamento ey. Segun Williams cu Charles a spera esaki y aunke e hendenan ta sugeri pa e abdica pasobra William y Kate ta mas popular, esaki no ta e caso y e ta absolutamente convenci cu e por haci un bon trabou.
Abdicacion, cu ta mas comun den otro casnan real europeo ora un monarca alcansa cierto edad, e ta extremadamente raro na Inglatera. E ultimo biaha cu un rey a abdica e trono tabata dia 11 di december 1936, ora cu King Edward VIII a aleha di monarkia despues di casi un aña pa casa cu e Wallis Simpson, cu tabata Mericano y divorcia.
Con su acceso na trono despues di fayecimento di su mama, Charles ta hereda tur e responsabilidadnan y e previlegionan di un rey consagra, excepto uno: e no ta wordo permiti uza un corona publicamente te na su coronacion. (P’esey no tin potret oficial di King Edward VIII cu un corona, ya cu el a abdica prome cu su coronacion, un hecho cu a ser menciona den e exitoso serie di Netflix: The Crown).
Segun e linea di sucesion real, Charles ta tuma e trono, sigui pa prins William, ken awo lo wordo sigui pa su yiu mayor Prins George, di 9 aña. Despues ta bin e ruman di George, prinses Charlotte di 7 aña, sigui pa su ruman menor, prins Louis di 4 aña. Prins Harry ta converti den e cinco den e linea di sucesion na e trono.
E luga di Charlotte den e linea real ta door di un ley di sucesion na 2013 cu ta permiti cu e corona por ser pasa pa orden di nacimento, independientemente di e genero. (Te e tempo ey, e reglanan di sucesion tabata establece cu e corona lo pasa pa e heredero mayor masculino y solamente na un heredero femenino ora no tin otro heredero masculino disponibel.)
“Esaki por parce algo menor, pero e ta un victoria grandi pa igualidad”, Williams ta bisa di e ‘amendment’. E ta bisa e hendenan, cu e Reina a demostra mas cu niun otro hende, cu un monarkia ta un trabou y un hende muhe por haci esaki mes bon cu un homber. Debi cu e ta tercer den linea, Charlotte lo haya su asiento riba e trono Britanico, aunke mester algun cambio entre e diferente titulonan di e famia real door di e fayecimento di Queen Elizabeth.
Charles
Antes: Prince of Wales and Duke of Cornwall
Awo: King Charles III, King of the United Kingdom of Great Britain and Northern Ireland
Camilla
Antes: Duchess of Cornwall and Princess of Wales
Awo: Queen Consort
William
Antes: Duke of Cambridge
Awo: Prince of Wales
Kate
Antes: Duchess of Cambridge
Awo: Princess of Wales
George
Antes: Prince George
Awo: Prince George of Wales
Charlotte
Antes: Princess Charlotte
Awo: Princess Charlotte of Wales
Louis
Antes: Prince Louis
Awo: Prince Louis of Wales
Archie and Lili
Tabata: Archie y Lili
Awo: Prince Archie y Princess Lili
