E stereotipo di miss of reina pa loke ta spera di e apariencia fisico di un participante, a haci dificil pa Jahë Bikker y Tychessa Melo por participa den e certamen di nan soño. E mas cerca cu Jahë por a yega di esaki ta yuda backstage of yuda cu coreografia pa e shownan di reina, te dia cu el a bay pa Queen of the Sky 2019. Ademas di a logra e corona, el a gana diferente premio y su siguiente corona tabata como BC Model Carnival Queen 2021, y aki tambe el a bay cu hopi premio.

Momento cu Jahë a sinti cu esaki tabata tur loke e mundo di beyesa tin p’e, el a ricibi e bon noticia cu e ta wordo corona como e prome Thick Madame. El a biaha pa Colombia pa representa Aruba den e certamen Plus Universal Queen International 2022, unda el a logra e corona maximo na juni ultimo. Jahë Bikker ta bisa cu el a siña durante tempo cu size, color di cuero, rasa y religion no ta defini un persona pa ken e ta como ser humano.

Como un hoben cu un trayectoria amplio den e mundo di beyesa cuminsando for di su 6 aña di edad, e titulo di Miss Teen Glorious 2022 tin un significado hopi personal pa Tychessa Melo. Door di su apariencia fisico nunca e tabatin e posibilidad pa competi den un certamen di Miss Teen te cu e aña aki cu GLW Foundation a inicia cu inclusion pa e hobennan plus size of cu poco mas curva.

Tyshessa ta corda cu el a ricibi critica riba e page di Facebook di Miss Teen Aruba Internacional riba su prome potret oficial di nan photo shooting. Un persona a comenta cu e ta gordo y cu e no ta bunita pa competi den un certamen manera Miss Teen Aruba. El a ignora e comentario aki totalmente, pasobra den ful su trayectoria den e mundo di beyesa semper e tabata e candidata mas diki den tur, y semper el a ricibi mal comentario tocante su apariencia fisico.

El a traha duro riba su amor propio pa nunca e tipo di comentarionan aki afecte! P’esey e kier bisa tur hoben eyfo cu e comentarionan negativo cu un persona duna bo, no ta defini abo como persona! Abo ta un hoben expectacular y briyante den bo mes un forma! – ‘Dare to be AUNTHENTIC’ – nada no lo por surpasa e beyesa cu bo ta transmiti ora bo durf di ta bo mes!

Lesa mas di tur e retonan cu Jahë Bikker y Tychessa Melo a enfrenta den Focus Digital Magazine di september, cu ta accesibel via Apple iStore, Android Google Play Store y www.focus.aw (Menu Tab FOCUS DIGITAL)

LEAVE A REPLY

Please enter your comment!
Please enter your name here