E tayernan exitoso di ‘street painting’ cu Gustave Nouel a duna na e artistanan di tur nivel, cual National Institute of Arts (NIA) a organisa na Sint Maarten y un mural colectivo na Belair Beach Hotel, hunto cu algun tayer y un masterclass den bailamento cu Arlene Halley a duna na centro di arte Kunstcircuit na Deventer, tabata instrumental pa stimula e intercambio cultural nobo na 2023. Esaki lo a cuminsa na 2020, si no tabatin Covid y lockdown.
April 2023 e prome intercambio cultural di diferente disciplina di arte entre kunstcentrum Kunstcircuit (www.kunstcircuit.nl) y NIA (www.nationalinstituteofarts.com) lo bira realidad. Si e ‘pilot project’ aki cu Sint Maarten ta un exito, intercambio cultural cu Aruba na 2024 lo ta un proximo soño pa realisa. Ya tin cierto palabracion y plan pa realisacion di esaki.
Directora di NIA na Sint Maarten, Arlene Halley, ta un bailarina internacional cu a cuminsa baila na Aruba, caminda el a nace y tambe tabatin su mes scol di baile na Venezuela, Merca y Sint Maarten, prome cu hunto cu Clara Reyes, el a funda Centro di Arte NIA na Philipsburg dies aña pasa. Ademas di baile riba nivel maximo, NIA ta stimula Arte Visual, Musica y Teatro. Y tambe arte interdisciplinario y experimental, mescos cu na Kunstcircuit di Deventer (www.kunstcircuit.nl) caminda Gustave Nouel ta duna workshops di pintamento. Si e intercambio ‘pilot’ aki ta un exito, tin plan concreto pa cuminsa cu un intercambio ‘grassroot’ similar den nos Reino na Aruba, Corsou y/o Bonaire, cuminsando na 2024 (tambe cu intercambionan entre e islanan).
Algun tempo pasa Gustave a ofrece Tito Bolivar un mural inspira pa ‘Climate Change’ y tambe pa duna workshops di ‘street painting’ na Aruba Art Fair, si ta posibel. Curator, Renwick Heronimo cu lo focus riba historia (di arte) Arubano, a invita Gustave pa bin expone na Art Fair ’22. Gustave ta spera cu durante Art Fair tambe lo por presenta su pintura ARUBAN PRANK AND PRIDE, pa prome biaha na Aruba. ARUBAN PRANK AND PRIDE a ser presenta oficialmente, den Pabellon Hulandes na Worldexpo’92, Sevilla. Intencion di Gustave ta pa laga ARUBAN PRANK AND PRIDE atras na Aruba pa coleccion di e Museo Arubano cu fundacion ARA kier logra na 2024, si Art Fair logra trece y mustra e pintura ‘historico’ aki pa prome biaha na Aruba… Un pintura universal, inspira pa nos identidad, orguyo y pa nos ‘STATUS APARTE’.
