Awe a keda oficialmente anuncia cu ATANIRO lo forma parti di e ‘line-up’ di entretenimento musical na Cirque du Soleil Charity Gala. E cantante hopi admira aki lo haci su show mey anochi, unda manera el a anticipa cu e lo pone ambiente completo den Renaissance Convention Center. Esaki ta prome biaha cu ATANIRO ta presenta den Kiwanis Club of Aruba su charity gala y hunto cu e tres bandanan: Buleria, ‘N Fusion y Tsunami ta bay bira un anochi di diberticion, ambiente, bailamento y gozo.
Pa complace tur gusto tin e aña aki un biaha mas, DJ Edson Tromp, cu su seleccion di cancion di 80s, cu semper ta atrae un publico grandi riba e pista di baile pa swing riba un otro ritmo. No unicamente tin e tremendo parti musical pa entretene durante Cirque du Soleil, pero ta bay tin tambe entretenimento acrobatico y aerial dancers, cu un show special di RCC Aruba, cu a haci un impacto grandi na America’s Got Talent.
Segun e miembronan di committee fundraising a informa awe mainta durante entrevista na diferente radio emisora, cu tin solamente algun carchi ainda obtenibel y cu nan ta anticipa un ‘sold out’ den e proximo dianan. Pa un ticket di AWG 450.00 valido pa dos persona, lo tin ademas di entretenimento, un exkisito dinner buffet, diferente bar cu excelente biña, whiskey, craft beer, mojito y sangria.
E decoracion den Renaissance Convention Center lo bay ta simplemente espectacular manera semper por spera di e fiestanan di Kiwanis Club of Aruba. Esaki sigur ta un evento cu bo no por perde riba diabierna 18 di november!
