Tiffany Trump (29), e yiu muhe di Donald Trump y Marla Maples, a casa diasabra cu e empresario di origen Libanes, Michael Boulos (25), despues di casi dos aña di compromiso. E pareha a casa na Mar-a-Lago Club cu ta di e famia, net despues cu e tormenta tropical Nicole a pasa na Florida y tres dia prome cu a spera cu Donald Trump lo anuncia su candidatura pa eleccion presidencial 2024. E mayornan di Tiffany tabata casa entre 1993 y 1999, y di band’i su tata e tin tres ruman mas, cualnan ta Ivanka, Don Jr., Eric y Barron Trump.
Tiffany a scoge un shimis di bruid crea pa e diseñador Elie Saab como un conexion na e herencia Boulos. E mama di e bruid tambe a luci un shimis di Elie Saab y el a bisa cu e casamento ta un enlace Mericano Libanes, y nan ta contento cu e diseñador a crea e magia pa e ocasion special aki. E bolo di bruid a ser inspira for di e tempo cu Donald y Marla a casa, cu tabata un bolo di Sylvia Weinstock personalisa di Donald y Maples, cu segun e mama di Tiffany, cu e tabata kier recrea pa su casamento.
Tiffany y Boulos a cuminsa date na 2018 despues di conoce otro na e club di Lindsay Lohan na Mykonos, Grecia. E pareha a compromete na januari 2021, na final di e mandato di e tata di Tiffany como presidente. Boulos cu ta yiu di un famia Libanes rico cu tin negoshinan na Nigeria, a propone matrimonio den Rose Garden di White House cu un renchi di diamanta cu bal 1,2 miyon dollar. Segun un fuente cercano di famia Trump, cu Tiffany no ta asina involucra cu e dinamica familiar manera Ivanka, Eric y Donnie Jr. E no ta papia mucho di su tata y semper e tabata independiente di henter e famia.
