Awe 11-11 cu ta celebra inicio di Carnaval No. 69 cu oficialmente ta start sali dia 7 di januari 2023, nos ta trece un articulo cu a sali publica na februari 2014 den revista FOCUS. Awo casi nuebe aña despues nos carnaval a evoluciona y hopi cambio a bin na caminda. Aki nos ta trece parti di e historia di eleccion di Reina di Carnaval prome cu e eleccion pa scoge e Reina di Carnaval Diamante!
Segun historia, desde 1948 diferente club social tabata eligi nan reina pa asina nan por a habri nan grupo di carnaval, pero ta te na 1955 a haci un eleccion unda tur e reinanan ta bini hunto pa competi pa un solo corona pa e Reina di Aruba su Carnaval. Manera tur hende sa mayoria clubnan social tabata di playa pero e ambiente di steelband y carnaval ta bin di San Nicolas, e gruponan a uni y asina na 1955 e prome eleccion di Reina a tuma lugar na San Nicolas, y e prome Reina tabata Evelina Jansen den feliz memoria. E reinanan tur tabata luci den trahe di gala color blanco y tabata hopi estricto den eligi un reina y nada sexy nada di pia mag sali.
E reinanan tabata wordo treci den un auto convertible y tabata wordo escolta pa mariniers, despues nan sinta y ta wordo yama un pa un pa ricibi un bouquet di flor. Esaki tabatin su triki tambe cual tabata cu e candidatanan ta conta nan step pa bay dilanti pa ricibi nan bouquet y poco poco ta cana bay di lomba patras contando nan pasonan y cu nan pia di sapato nan ta purba na touch pa wak si nan sapato ta mishi cu e stul pa nan por sinta. E tabata un forma unico y hopi elegante y nan mester a keda sinta cu un smile pa mas cu 2 ora durante full e eleccion. Y claro tabatin candidata di nervio ta hera e stul of wak patras cual tabata haci cu nan ta perde punto.
Segun e añanan ta pasa e forma con e eleccion ta wordo organisa tambe a cambia y tabata haya e candidatanan tur ta presenta bou ritmo di steel band y ta baila, cu nan mes un trahe di gala nan ta duna nan speech y haci nan presentacion tambe. E forma elegante con nan tabata uza nan man pa saluda nan publico, a pasa cu candidata a yega na descualificacion door di un split chikito di rudia te abou of door di a presenta den trahe di gala na color. Princes Beatrix a yega di presencia un eleccion di Reina di Aruba su carnaval ora e tabata jong.
Aña 1964 tabata uno historico caminda Sr. Milo Croes ta haya e franquicia pa manda un representante pa Miss Universe y Lidia Henriquez, cu tabata di 10 Reina Grandi tabata e prome cu a representa Aruba na un evento internacional. Despues e reinanan tabata haya invitacion henter aña pa representa Aruba den exterior pa cualkier evento cultural. Na 1980 por bisa cu un Reina a wordo eligi cu un shimis blanco cu plata e mes un aña Miss Universo Maritza Sayalero di Venezuela tambe tabata na Aruba y a presencia e eleccion y a habri e parada hunto cu e Reina di Carnaval 1980, Rose-Ann Lejuez. E tabata un honor pa cualkier mucha muher di 18 aña competi pa Reina di Carnaval unda un auto tabatin como premio maximo.
Poco poco e tendencia a cambia y e candidatanan a cuminsa ta presenta bou cancionnan di soca y te despues den añanan 80 bou ritmo di roadmarch, y candidatanan tabata haci nan aparicion inoficial cu un trahe cu e organisador ta duna nan y despues den gala. Na ‘87 e candidatanan a cuminsa presenta den un costume carnavalesco y ta te na 1993 a cuminsa eligi Best Costume. E reinanan tabata wordo corona pa Gobernador y na 1986 unda Aruba a logra haya su status aparte Sr. Capeis Lacle como e prome Prins di Carnaval a corona Wendy Geerman y na 1987 pa prome biaha den historia Sr. Henny Eman como Prome Minister di Pais Aruba a corona Jerusha Rasmijn di Savaneta como e di 33 Reina Grandi.
Na 1991 a bin un cambio grandi unda e candidata despues di su presentacion oficial e por a bay descansa tras di stage y mientras e otro candidata ta haya chens pa presenta. Motibo ta cu hopi biaha e candidata number un mester keda te ora e ultimo candidata presenta y ta keda hopi cansa. Durante eleccionan di reina e shownan a bira masha popular y tambe turistanan cu menos di 24 ora na Aruba ta fungi como cuerpo di hurado. Ultimo añanan e eleccion a bira hopi grandi y popular pa e shownan di costume impresionante y e trahe di gala di mas bunita. No ta keda nada otro di spera miho so di e gran eleccion di diamante. (Como e Reina Diamante a keda corona Zuriah Flemming cu ta Aruba Carnival Queen 2014)
