![](https://focus.aw/wp-content/uploads/2023/02/Highlight-John-y-JudithIMG-20230124-WA0025.jpg)
Un reina cu a topa su prins na Bonaire ta celebrando 45 aña aniversario matrimonial na juni 2023. Judith Evertsz tabata resalta pa su bunitesa y simpatia, y tabata popular na Bonaire como Reina Hubenil di Carnaval y Miss Teenage Bonaire 1975. Den su ultimo eleccion cu el a participa prome cu el a casa cu John Fun, el a sali Reina di Carnaval di Bonaire 1978. E mesun aña ey riba dia 24 di juni, John y Judith a casa despues di un ‘noviasgo’ di 2 aña.
![](https://focus.aw/wp-content/uploads/2023/02/Highlight-John-y-JudithIMG-20230125-WA0115-840x1024.jpg)
E prome anochi cu John Fun a yega Bonaire contrata pa maneha Flamingo Beach Hotel na aña 1976, el a wak y a gusta Judith Evertsz. Despues di alrededor di dos siman porfin nan a conoce otro personalmente, y e relacion entre nan dos a klik mesora. John a muda bek pa Aruba pero prome cu esey, el a pidi e mayornan e man di Judith pa casa cu ne.
![](https://focus.aw/wp-content/uploads/2023/02/Highlight-John-y-JudithIMG-20230124-WA0029.jpg)
Seis luna despues John a bay Bonaire pa casa y trece su bruid bek Aruba caminda ya e tabatin trabou y cla pa forma un hogar. E aña aki dia 24 di juni John y Judith ta celebra nan ‘Sapphire Wedding Anniversary’, esta 45 aña di aniversario matrimonial, cu ta un total di 16.425 dia hunto como esposo y esposa.
![](https://focus.aw/wp-content/uploads/2023/02/Highlight-John-y-JudithIMG-20230125-WA0113-1024x789.jpg)
Den Focus Digital Magazine di e luna di februari, John y Judith Fun ta comparti consehonan valioso pa un bida balansa y un matrimonio feliz. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL)