Elvis Tromp ta un artista cu ta destaca pa su obranan excepcional uzando principalmente e temanan local manera flora, fauna, paisahe, cas, edificio y monumento. Elvis su meta ta pa purba inspira nos hendenan a traves di arte, pa aprecia nos cultura y nos custumbernan. No solamente pa siña nos mes aprecia, cuida y balora nos isla, pero tambe pa haci mundo conoci cu e bunitesa di Aruba. Un isla cu aunke ta chikito ta ofrece un variedad grandi di tema cu por wordo pinta den un forma unico riba canvas.
Elvis a lanta rondona cu verf door cu su tata tabata traha como ‘verfmenger’ y semper tabata trece ‘tinta’ di diferente color cas. E tabatin acceso for di chikito na tur e verfnan y asina el a cuminsa experimenta riba tur locual cu e por a haya na su cas manera carton, plywood y muraya. El a crece y sigui desaroya su arte cu a converti den su pasion y ta sinti un satisfaccion enorme cu su arte ta wordo balora y aprecia tanto local como internacionalmente.
Elvis Tromp ta elabora riba su trayectoria como artista den Focus Digital Magazine di maart, cu ta accesibel gratis a traves di Apple iStore, Android Google Play Store y www.focus.aw (Menu Tab FOCUS DIGITAL).
