E modelo y presentadora di television Portoriqueño, Marisol Malaret, cu a haci historia ora el a converti na 1970 den e prome Miss Universo di e isla, a fayece diadomingo 19 di maart cu 73 aña di edad. Despues di a gana e corona, Marisol Malaret a enfoca riba su carrera den comunicacion, presentando varios programa di television na e canalnan di Puerto Rico, el a fungi tambe como directora di e revista Caras y un empresaria exitoso. Aunke su morto no a ser plama inmediatamente entre e medionan, e noticia di e fayecimento di Marisol Malaret na un centro hospitalario a causa conmocion na Puerto Rico.
Solamente algun persona y siguidonan tabata sa cu e exreina tabata interna na un hospital di e capital. Un di e prome celebridadnan cu a post su comentario riba su Instagram tabata ex-Miss Universe, Dayanara Torres, cu a reconoce den Marisol Malaret como un ehempel di lucha y perseverancia pa tur e Portoriqueñonan. El a skirbi cu Marisol semper tabata su Miss Universo, ken el a admira no solamente pa e gloria cu el a duna tur e Portoriqueñonan, pero tambe pa e gran ser humano cu e tabata. E ta balora nan momentonan hunto, su consehonan y hasta su zundranan, pasobra di algun manera semper el a sinti e deseo di cuid’e manera un mama ta haci cu su yiu muhe.
Marisol Malaret a keda huerfano tempo cu e tabatin solamente 8 aña di edad y un tanta a cuid’e hunto cu su rumannan. Despues di a finalisa su estudionan, el a inicia su caminda den e ambiente di modelahe y pasarela mientras e tabata completa un grado den ‘asociado en ciencias secretariales’. Prome cu el a bira e mucha muhe mas bunita di e planeta, Malaret a traha como secretaria ehecutivo di ITT, empresa cu despues a bira Telefónica de Puerto Rico. Curiosamente, tabata eynan unda el a dicidi di participa pa e corona di Señorita Puerto Rico despues di e motivacion di su coleganan. Solamente 2 luna despues di a ser corona como Señorita Puerto Rico, Malaret a logra e prome corona di Miss Universe pa su pais cu 20 aña di edad entre 69 pais na Miami Beach Auditorium.
