E bida di e yiu di e famoso cantante Spaño, Camilo Sesto, ta e ultimo tempo den noticia y no precisamente pa novedadnan positivo. E famia di Camilo Blanes, specialmente su mama -Lourdes Ornelas- ta hopi preocupa pa su yiu. E salud tanto fisico como psicologico de Camilín, manera e ta conoci den su entorno mas cercano, ta motibo di intrankilidad entre su hendenan, principalmente pa e potretnan impactante cu el a post algun dia pasa, cu despues e mes tabata delete.
Recientemente Señora Ornelas a conta abiertamente cu su yiu no ta bon, ta obvio, pero nunca el a yega na e grado aki di autodestruccion. El a sigui conta cu desesperacion cu e tin hopi tempo caba buscando ayudo pa su yiu y el a topa mil biaha cu un muraya fuerte su dilanti. Y awo un capitulo nobo a habri den e bida di Camilo ora el a aparece bisti na muhe riba su Instagram.
Cu cabey preto cu puyino y rasgonan hopi femenino, Camilo a post un potret cu a causa hopi alteracion entre su siguidonan. Hopi ta puntra si e ta un muhe trans, otro ta afirma cu e ta un manera di Camilo pa chercha di tur cu ta papia malo di dje, pa asina nan haya motibo pa papia. E posibilidad ta tambe cu por ta trata di un imagen crea pa inteligencia artificial den un di e tantisimo aplicacionnnan cu ta cambia di genero digitalmente for di un simpel potret.
Camilo Blanes mes no kier a duna niun splicacion riba e imagen aki y tur loke ta ser comenta ta simplemente rumor. Na november e yiu di Camilo Sesto ta cumpli 40 aña y tur loke cu sa ta locual esnan cerca di dje ta bisa. Recientemente nan a confirma na e revista Spaño ‘Semana’ cu Camilo ta biba rondona di “destrucción y caos” den su cas na Madrid, cu el a hereda di su tata cu a muri dia 8 di september 2019 cu 72 aña di edad.
