Ateliers ’89 Punto Di Beyas Arte Aruba a haci diaranson anochi apertura di e exposicion ‘Tera ta Canta’ presentando e obranan recien traha pa e participantenan durante e workshop di un luna di Ceramica na Ateliers ’89. E workshop tabata bou direccion di e artista maestro Samuel Sarmiento.
E participantenan na e workshop ta Mandy Wingh, Dimanche Irwin, Danilo Geerman, Kathleen Daliva, Lixanne Gemerts, Aldrich Kelly, Arabella Maduro, Romelinda Maldonado, David van Trikt, Marleen van Blarcum y Velvet Zoe Ramos.
Pa un luna largo e participantenan a traha duro bou di guia di e artista maestro Samuel Sarmiento, pa por a bin ta realisa e exposicion aki di nan excelente obranan traha durante e workshop. Y den un corto tempo di cuater siman mester a traha, laga seca y horna e obranan. No ta nada facil pa por experimenta y realisa bo expresion personal den klei.
P’esey por bisa cu e obranan ta den proceso, cu expectativa amplio di con cada un di e alumnonan lo sigui cu nan transicion den e mundo grandi di ceramica. E artista Curator di Ateliers ‘89 Punto Di Bevas Artes Aruba, Elvis Lopez, a gradici durante su speech na e apertura, e artista Ciro Abath di Glass and Ceramics Studio y tambe tur e sponsornan cu a contribui na realisacion di e exposicion di ‘Tera ta Canta’, cu ta Garage Centraal Aruba, La Cabana, Fundacion Mondriaan y Compra.
