Modelo y actriz, Zuleika Coffie, di Aruba a entrega ‘su’ buki quadrilingual (den 4 lenga) ‘MATERNIDAD’ na co-burgemeester di Deventer, Sr. Marcel Elferink, como acto di apertura di e exposicion ‘DESTINO PA SOÑO’, auspicia pa Oranjevereniging. ‘MATERNIDAD’ a ser publica pa LM Publishers. E buki universal aki ta un proyecto di cooperacion entre Zuleika y GN (www.gustavenouel.nl), cu apoyo di diferente otro artista Arubano.
E exposicion di 25 artista regional, titula DESTINO PA SOÑO, ta parti di un intercambio cultural entre ‘mama’ Hulanda y Sint Maarten, entre Kunstcircuit (www.kunstcircuit.nl) y NIA (www.nationalinstituteofarts.com/). Na Kunstcircuit por mira te dia 16 di juli arte cu ta busca coneccion cultural entre e diferente parti di nos Reino. Lilian Vos (Biblioteca)a coordina henter e proyecto piloto hunto cu directora di NIA y GN.
Artista/docente Silvia Carty a duna workshop tambe den estudio di ‘KUNSTWERKT’ na varios artista ‘special’. Galería Art Brut a organisa un subasta di arte pa apoya nan intercambio cultural cu Sint Maarten. Tambe na artistanan cu GN ta guia na asociacion di artista DAK, Silvia Carty a duna un workshop di Pop Art. Culminacion di e intercambio cultural tabata un presentacion den Deventer Schouwburg, di e proyecto interdisciplinario na Sint Maarten, cu baile y arte visual (Art2Fuse) di Base4Dance/Manon y e artistanan Rob y Annemarie. E pilot (‘grassroot’) a logra, y awo lo cuminsa prepara intercambio cultural, cu mas parti di Reino pa futuro. Tambe cu teatro, musica, moda, literatura y/o otro disciplina artistico.
Na Apeldoorn tambe recientemente, Zuleika Coffie y GN a entrega e buki di MATERNIDAD na wethouder Sunita Biharie, como un acto di apertura di KOM. Esaki ta un festival multicultural internacional nobo, cu a cuminsa na Apeldoorn na 2022, caminda varios cultura ta topa y tin hopi diversidad. Cu musica, danza, arte, workshops, cuenta/poesia, moda, actividad infantil, exposicion y actividad di diferente cultura cu ta participa. Desde e prome aña, GN a ser invita pa hasi ‘street-sketch’ na KOM.
Na 2023 tabatin escritor di diferente pais, cu a lesa algo di nan buki pa publico por a hasi pregunta despues. Actriz Zuleika Coffie, biba na Amsterdam pero representando Aruba tabata un sorpresa. Cu hopi emocion Zuleika a comparti un historia intimo cu su poesia ‘RESPET’, den e 4 lenga mas papia na Aruba. Publico presente a gusta e actuacion masha y a pidi Zuleika pa sigui lesa mas poesia.
Tambe ta un soño pa comparti ‘MATERNIDAD’ na nos Reino den Caribe. Maternidad (cu subtítulo: DI SOÑO PA REALIDAD), ta un proyecto di cooperacion den ‘imagen y palabra’ entre dos artísta profesional Arubiano reconoci. Un buki cu no ta unicamente un oda na maternidad universal (y particular), sino tambe e aspiracion pa yuda crea un brug entre e partinan Europeo y Caribense di Reino Hulandes y entre nan y resto di mundo, den e sentido artistico di e palabra.
