Cu hopi entusiasmo Oficina di Turismo y Ban Serio ta anuncia nan participacion na e tercer edicion di e Buki di Pret den forma di un ‘Scavenger Hunt’. Buki di Pret ta un buki diseña pa muchanan di scol basico y ta consisti di mas di 200 actividad y ofertanan special durante vakantie grandi. E meta di e Buki di Pret ta pa duna mas mucha y hoben posibel e oportunidad pa disfruta di nan vakantie na Aruba mes cu un serie di actividad gratis of na un prijs accesibel.
Den cuadro di esaki, Oficina di Turismo pa medio di su programa di conscientisacion Ban Serio, a uni su mes na e Buki di Pret den forma di un Scavenger Hunt. E Scavenger Hunt ta un actividad completamente gratis y ta traha specialmente pa muchanan y hobennan por explora, siña y disfruta di atraccionnan turistico y historico rond di nos isla. E Scavenger Hunt ta activo desde 8 di juli te cu 23 di juli.
E muchanan y hobennan te cu 13 aña por forma un team di maximo 5 persona cu ta consisti di minimo un adulto cu un auto. Cada team mester crea un nomber creativo, download y traha un account riba e MyAruba App. Cu un celular cu data por sigui e diferente pistanan y completa e tareanan na e diferente puntonan di interes. Cada team por completa e Scavenger Hunt den nan mesun tempo entre 8 y 23 di juli y por scoge e ruta cu ta cumbini nan mas. Tur team cu completa tur e tareanan ta participa pa gana premionan atractivo cu lo wordo anuncia den luna di augustus venidero.
Ban Serio ta un iniciativa di Aruba Tourism Authority cu tin como meta pa crea mas conscientisacion y pone mas enfasis riba e pilarnan Medio Ambiente, Hospitalidad, Cultura y Siguridad. Pa medio di diferente iniciativa y programa, Ban Serio ta pone atencion special riba e puntonan aki cu tin impacto riba Aruba como producto turistico y tambe riba e bida di nos hendenan local.
Ban Serio ta un iniciativa di Aruba Tourism Authority cu tin como meta pa crea mas conscientisacion y pone mas enfasis riba e pilarnan Medio Ambiente, Hospitalidad, Cultura y Siguridad. Pa medio di diferente iniciativa y programa, Ban Serio ta pone atencion special riba e puntonan aki cu tin impacto riba Aruba como producto turistico y tambe riba e bida di nos hendenan local.
Pa mas informacion tocante e Scavenger Hunt por bishita: https://banserioaruba.com/ of sigui Ban Serio Aruba riba Facebook of Instagram.
