Entre e 24 candidatanan cu a competi pa e corona di Miss Universe Colombia 2023, e ganadora a resulta den e representante di Casanare, Camila Avella, cu ta periodista, presentadora y modelo profesional di 27 aña di edad. Camilia a bira e di dos candidata despues di Miss Guatemala, Michelle Cohn, representante di Guatemala City, cu ta casa y tin yiu, cu lo competi den e certamen di Miss Universe dia 18 di november na El Salvador.
María Camila Avella Montañez tabata presentadora di e reality show ‘El Desafío’ y ta casa cu e empresario Nassif Kamle, doño di un fabrica textil. E tin un yiu muhe di 2 aña cu su nomber ta Amelia, cu ken e ta comparti diferente post riba su Instagram. Camila Avella a purba participa den edicion 2018, pero el a keda descualifica door cu e no a cumpli cu e rekisitonan. Sinembargo pa edicion 72 di e certamen a modifica e reglamentonan, cu awo ta permiti muhenan casa, divorcia y cu yiu participa den e certamen di Miss Universe.
Michelle Cohn, Miss Universe Guatemala, ta wordo considera na su pais como un simbolo di perseverancia y inspiracion. Na 2013, Michelle a gana Miss Guatemala Latina, obteniendo e oportunidad di representa su pais na 3 competencia internacional, pero cu e deseo di por participa un dia den e certamen di Miss Universe. Michelle tin su casa y un yiu muhe di 2 aña cu su nomber ta Bella, cu ta un mini modelo caba promocionado varios marca hunto cu su mama riba Instagram. Michelle Cohn tin 28 aña y ta duna merito na su casa cu semper a apoye den su crecimento y exito.
Colombia a logra dos corona universal, Luz Marina Zuluaga na 1958 y Paulina Vega na 2014. Ademas di e corona maximo nan a logra varios titulo di finalista den e top di e certamen di Miss Universe. Guatemala nunca tabatin e suerte pa gana e corona di Miss Universe, pero a logra posiciona den Top 10 na aña 2010 y 1984, y Top 15 na aña 1955.
