E celebracion di 10 aniversario di Aruba su hotel di luho tabata centra riba e hotel su recurso di mas importante den e compromiso di servicio pa cu tur bishitantenan – e Damanan y Cabayeronan di The Ritz–Carlton, Aruba.
E hotel a organisa dia 14 di november un anochi memorabel y special pa e Damanan y Cabayeronan, e ‘charter team’ cu a habri e portanan di The Ritz-Carlton, Aruba 10 aña pasa. E hotel ta conta cu un impresionante ‘charter team’ di 152, un cantidad cu ta representa casi 25% di tur e Damanan y Cabayeronan cu ta traha na e hotel awe.
E celebracion a continua dia 15 di november ora tur e Damanan y Cabayeronan di e hotel tabata invita den e luhoso Ritz-Carlton Ballroom y acompaña di distinguido invitadonan manera representantenan di Desarollos Hotelco, ATA, AHATA, y Marriott International. Un celebracion inolvidabel unda a duna reconocimento na cada un Dama y Cabayero di e hotel y a gradici nan pa nan dedicacion, servicio excepcional, compromiso, y pa e mas di 29,200 ora di servicio na Community Footprints y nos isla stima, Aruba.
Pa e dia di aniversario di e hotel, 22 di november, e Damanan y Cabayeronan tabatin e gran placer y honor di comparti un momento special cu e huespednan y e miembronan di Marriott Bonvoy, un evento na lama cu a refleha e esencia di Aruba y unda a duna agradecimento na tur e miembronan pa nan lealtad y a celebra hunto cu nan e di e 10 aña di The Ritz-Carlton, Aruba.
For di su apertura na 2013, The Ritz-Carlton, Aruba situa na e prestigioso area di Palm Beach a brinda hospitalidad di luho na e isla di Aruba. E resort ta renombra pa su elegante cambernan, espacionan di eventonan, restaurantnan exkisito, manera BLT Steak y Casa Nonna New York, spa di luho, un vibrante casino, entre otro amenidadnan di e resort.
Na fin di 2022, cada un di e 320 cambernan a wordo renoba y ta brinda un diseño moderno, elegante y cu ta refleha e entorno natural di e isla. Ademas di interiornan renoba, e resort tambe a introduci un programacion actualisa, cu e ultimo adicion cu ta e Madero Pop-Up Bar y tambe e grandioso promocionnan di The Casino at The Ritz-Carlton, Aruba.
“E ultimo 10 añanan a representa un biahe extraordinario pa nos resort, nos bishitantenan, nos Damanan y Cabayeronan, y nos comunidad local”, e palabranan di Steven Redkoles, Gerente General di Area, y el a sigui bisando: “Desde nos apertura, e resort iconico aki a brinda un hospitalidad y servicio di luho, experencianan personalisa y inolvidabel na cada un di e bishitantenan. Nos ta sumamente agradeci pa e grandioso decada y ansioso pa continua brinda e servicio legendario cu The Ritz-Carlton ta conoci pe, crea momentonan inolvidabel pa nos huespednan y sigui contribui cu Aruba su turismo. Nos ta warda cu hopi emocion”.
Download bo revista awo!
