E sensacion tabata uno di gratitud y logro pa Ryon Dijkhoff momento cu el a ricibi un ‘standing ovation’ na Aruba Fashion Week. HERENCIA 2023 ta e coleccion cu el a prepara pa lansa su marca cu mas liña di producto na e evento di moda realisa na Aruba. Loke a pasa den su mente tabata cu drs. Ryon Dijkhoff di profesion y enfoke grandi como Audit Manager na Grant Thornton Aruba, awo tambe a logra un di su soñonan desde hoben. Semper su deseo tabata pa ta rondona di energia bunita, un sentimento y momento pa bida largo.
E idea tabata semper den su mente creativo pa ademas di joyeria pa lansa mas liña di producto. Ryon a haya un oportunidad y hunto cu su ekipo, el a traha pa pone tur cos riba pasarela cu 39 Look – e runway di mas grandi di Aruba Fashion Week 2023 – di un marca y diseñador Arubiano. For di joya te cu acesorio y e liña di paña a tuma casi 1 aña, pero e pañanan mes a wordo haci den e ultimo etapa den transcurso di dos luna. Cada liña di producto di MAISON RYON tin su tempo y dedicacion.
E pregunta na Ryon Dijkhoff si e coleccion aki ta posiona MAISON RYON riba un plataforma mas internacional, el a bisa: “Desde inicio mi a posiciona mi mes riba mercado local, mi tin turistanan semper interesa den mi coleccion, pero e enfoke y crecemento mi tin di gradici na nos localnan. Claramente mi kier enfoca riba ambos mercado y mi tin hopi amistad cu ta biba afo cu tin piezanan di MAISON RYON. Aworaki via Aruba Fashion Week mi no tin duda cu e lo haya atencion di nos bishitantenan, pero tambe internacional door di diferente influencers y Vogue Mexico cu tabata presente na AFW”.
Ryon Dijkhoff ta defini den solo frase 2023 como un aña yena cu bendicion, felicidad, oportunidad y reto, pero mas cu tur cos agradecido pa tur aspecto paso nan ta parti di su caminda di bida. Lesa mas di e coleccion di MAISON RYON y tur e comentarionan cu el a ricibi cual el a acepta cu hopi humildad. E revista ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
Download bo revista awo!
