Un anochi magnifico a ser celebra na Embassy Suites Aruba pa reconoce y duna elogio na e miembronan di ekipo cu nan prome “Team Member/Supervisor of the Year Award Night” dia 31 di januari ultimo. E general manager di Embassy Suites Aruba, Pablo Casal y director di recurso humano, Angelique Croes riba e anochi aki a gradici y bisa danki na e miembronan di ekipo pa nan trabou excepcional. E tabata un momento special pa reconoce tur e 19 miembronan di ekipo cu a keda nomina pa nan servicio sobresaliente durante aña 2023.
E maestronan di ceremonia pa e anochi aki tabata Pablo Casal, Angelique Croes y Zia Habibe. Durante e ceremonia, Angelique y Zia, cu ta fungi como coordinador di recurso humano, a dedica un speech personalisa mencionando caracteristicanan special cu ta distingui e 19 nominadonan y compartiendo algun anectoda dibertido di cada uno. E nominadonan a ser acompaña pa un miembro di nan famia, cu tambe a ricibi bunita palabranan di agradicimento pa e sosten brinda na nan ser keri durante henter aña. Despues di hopi anticipacion a revela e ganadornan na final di e anochi, cu a resulta den persona di Janice Cater y Rosalyn Flanegin.
Janice Cater – F&B – Waitress ta e ganador di “Team Member of the Year 2023”
Janice tabata entre e prome personanan cu a asisti na e Job Fair organisa pa Embassy Suites na november 2022. Desde e dia ey tabata imposibel pa lubida Janice. Janice ta un persona hopi alegre y positivo, cu ta transmiti hospitalidad. Ora el a bin forma parti di e ekipo di e hotel, el a mustra su disponibilidad na cualkier momento pa duna un servicio excepcional. Unda cu Janice ta, esnan rond di dje ta sinti su energia positivo y encanto.
Rosalyn Flanegin – Housekeeping – Housekeeping Supervisor ta ganador di “Supervisor of the Year 2023”
Rosalyn ta demostra cu e tin e capacidad di ehecuta su trabou cu amor y dedicacion. E tin un excelente relacion cu su ekipo y ta sigura cu e departamento ta funciona sin problema. Rosalyn ta hopi harmonisa cu su ekipo y ta ser mira como un persona di confiansa cu por acudi pa pidi conseho. E ta tambe un persona hopi chistoso y ta diberti cu tur hende siendo semper respetuoso.
Eugenille De Marchena, Rai Roga y Angelo Marchena
Xyanthe Laclé y Jessica Peterson
Jessica Peterson, Zia Habibe, Angelique Croes y Xyanthe Laclé
E ganadornan a ricibi ademas di nan award como “Team Member y Supervisor di Aña”, tambe diferente otro premio y entre cual un bunita bouquet di flor. Tur 19 nominado incluyendo e ganadornan a haya un regaldo personalisa. E miembronan di ekipo a sinti nan mes sumamente special durante e evento aki, unda nan por a comparti den un ambiente di cordialidad cu nan colega y famia. E miembronan di famia presente a haya e oportunidad tambe pa conoce e hotel y disfruta di un bunita evento, cu un cena exkisito cu a ser deleita cu e presentacion di un guitarista y cantante pa haci e prome “Team/Supervisor of the Year Award Night” un evento memorabel.
