E show ‘Alex en Vivo’ a traves di Telemundo 47 a inicia na Aruba cu nan proyecto internacional pa bishita diferente destinacion turistico. E programa tin 8 aña caba brindando e audiencia un contenido cu ta inclui entretenimento, cultura, gastronomia y historia di e comunindad Hispano na Merca. E presentador y productor di ‘Alex en Vivo’, Alex Hermoso, tin un aprecio grandi pa Aruba, cu e ta considera su di dos pais despues cu el a sali di Venezuela. El a biba varios aña aki prome cu el a bay Merca pa sigui su soño, cual awe ta cosechando e fruto di su dedicacion y esfuerso.
Alex a start sali e aña aki cu exito cubriendo e red carpet di Grammy Awards 2024 na Los Angeles. El a continua siguientemente cu su biahe pa Aruba pa graba programa di Season 14 y 15, unda el a pisa bek e suela di Aruba despues di 20 aña. El a keda completamente impresiona di haya un isla cu un cambio impactante y totalmente diferente. E bishita cortico pa haci su show segun Alex Hermoso tabata un locura total, pero e ta agradecido di tabatin un ekipo hopi profesional bou guia di Jonathan Vieira y su ekipo di produccion.
Durante su estadia cortico na Aruba, Alex Hermoso a hospeda na Aruba Ocean Villas, unda el a keda absolutamente fascina y ta describi como un paraiso, cu ta destaca e beyesa y proyeccion natural di Aruba. Lesa tur mas di e plannan cu Alex Hermoso tin specificamente pa Aruba den Focus Digital Magazine di maart, cu ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
