E Prome Santa Comunion ta un di e celebracionnan cu tin un significacion hopi special den e seno di e famia Catolico. E ta un motibo di felicidad pa e muchanan y nan sernan keri, cu ta spera cu hopi emocion pa e bunita ceremonia aki. Den edicion di Focus Digital Magazine di e luna aki ta resalta tres hobencita, cu nan mama tin un laso special cu e revista y ta comparti e momentonan di mas emocionante dia cu nan yiu muhe a ricibi Santa Hosta pa prome biaha.
Carolyne Kock: E ta yiu muhe di mas chikito di Chastity y Robert Kock y el a ricibi su Prome Santa Comunion na misa Parokia Sagrado Curason di Hesus Savaneta, Carolyne tabatin e honor di por a canta su cancion nobo cu el a estrena un siman prome cu el a ricibi. E cancion titula: “Ya bo no ta pan y biña” cu ta un cover cu a wordo traduci na Papiamento y ta special dedica na e Prome Santa Comunion di e muchanan. Carolyne Alessandra Sophia tabata hopi emociona y contento cu e lo bay ricibi Hesucristo pa prome biaha.
Gulianne Vrolijk: Cu hopi entusiasmo Derchlien Dijkhoff a prepara pa e Prome Santa Comunion di Gulianne ‘Guli’ Arianne Vrolijk. Como un mucha cu ta mustra hopi emocion, Guli tabata emocional y entusiasma pa su ricibimento. Durante e ceremonia na Misa Papa Juan Pablo na Tanki Leendert, Guli a canta hunto cu su amigitonan di Colegio Felipe B. Tromp tur cantica masha bunita. Aunke e no tabatin un rol specifico durante e ceremonia, e tabata un momento di hopi emocion ora nan a drenta den misa na comienso di e ceremonia. Un emocion mas profundo ainda tabata e momento cu Guli a ricibi Santa Hostia.
Amalia-Sofia Tromp: E momento cu Lizayra Polak a mira su yiu muhe, Amalia-Sofia Cathaleya Tromp, den su shimis blanco bunita manera un prinses, tabata p’e hopi emocional. El a haci su maximo esfuerso pa su yiu logra haci su Prome Santa Comunion. Esaki debi cu Amalia-Sofia a kere cu e no lo bay ricibi y no a entrega e papel, cu el a haya na Mon Plaisir Basis School. Apesar di tur e contratiempo cu a surgi toch Lizayra a haya tur e coolaboracion necesario pa asina su yiu muhe por a ricibi Curpa di Cristo pa prome biaha na misa Parokia Santa Filomena na Paradera.
Despues di e ceremonia na misa cada uno di e hobencitanan aki a celebra nan Prome Santa Comunion cu un bunita celebracion. Den Focus Digital Magazine por lesa mas tocante e ceremonia y celebracion ilustra cu bunita potretnan. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
