E siman di 7 di october te cu 13 di october 2024, e comunidad local y e bishitante di e isla lo bay experiencia Autentico Aruba Culinary Festival. Un evento cu lo duna enfasis na e variacion culinario cu Aruba tin pa ofrece y e talento excepcional di nos chefnan. E festival aki ta duna oportunidad unico pa explora e variacion rico di cuminda, pa descubri restaurantnan nobo, saboria, y pa aprecia cushina di calidad halto cu ta refleha e tradicion culinario y e diversidad cultural di Aruba. Cu mas di shen nacionalidad riba nos isla, e evento aki lo bira otro momento di celebracion di nos herencia cultural y e diferente sabornan cu ta forma parti di nos identidad.
E festival lo sirbi como un plataforma pa e sector culinario por presenta nan producto, pa crea mas sosten y entusiasmo local, e lo uni tambe restaurantnan cu studiantenan culinario di EPB y EPI, y lo yuda na posiciona Aruba como un destinacion culinario na nivel internacional. Sin lubida e hecho cu ta spera cu e inspira nos hobennan pa uni nan mes na e industria culinario vibrante na Aruba.
Autentico Aruba Culinary Festival ta dividi den dos parti:
E prome parti lo conta cu un Autentico Restaurant Week: cu lo cuminsa entrante dialuna 7 di october te diabierna 11 di october, aki ta caminda cu restaurantnan participante lo presenta nan propio menu, diferente oferta of eventonan special cu lo wordo publica riba e calendario di evento riba e website di Autentico.
E di dos parti di e festival lo conta cu e asina yama ‘Wilhelminastraat Culinary Festival’ durante e weekend di 12 di october y 13 di october na e historico Wilhelminastraat den centro di Oranjestad. E evento aki lo duna e local y e bishitante e oportunidad pa disfruta di un variacion di cuminda y bebida na e diferente standnan cu lo tin presente, ilustrando e mundo di gastronomia representativo di Aruba. Hunto cu esaki, lo tin entretenimento local y competencia di Bartender’s Brawl y Iron Chef Aruba riba e podium principal.
Kico por spera durante e evento?
Durante di e Bartender’s Brawl riba diasabra 12 di october, lo conta cu e di seis edicion di e evento aki na Aruba. Aki ta caminda cu varios bartender lo competi pa asina presenta bebidanan original di cocktail.
Durante di e competencia di Iron Chef na e podium principal riba diadomingo 13 di october, tres chef lo competi pa asina prepara platonan special, hunto cu asistencia di studiantenan culinario di EPB y EPI.
Banda di esaki, e publico lo por spera un gran variedad di restaurant cu lo presenta dos di nan platonan na un prijs atractivo, mientras cu por gosa di talentonan musical local den e cayanan di Wilhelminastraat. Lo tin varios luga cu por sinta, relaha y disfruta di e evento.
Pronto tur tickets lo ta disponibel riba pagina web www.autenticofestival.com. Cu compra di un ticket “Weekend Pass” na balor di AWG. 54 lo ricibi un credito di AWG. 30 cu lo por wordo uza bek riba dianan di e evento. Of por cumpra un “Day Pass” na balor di AWG. 36, y ricibi un credito di AWG. 20 pa por uza riba e dia di e evento. Cada ticket ta inclui un cup reusabel, credito di cuminda y bebida, y entrada pa e competencianan di e Bartender’s Brawl y Iron Chef.
Credito no uza lo ta wordo uza como donacion na un bon causa.
Sigui Autentico Aruba Culinary Festival riba Facebook, Instagram, y www.autenticofestival.com pa mas informacion.
Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta para pa un balanse entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balanse menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.
