Cu hopi placer ta anuncia cu e Aruba Global Travel Conference 2024 tabata un exito rotundo. E conferencia cu a tuma luga riba nos isla entre 17 cu 20 di september, a culmina cu un celebracion special riba Renaissance Island. E di dos Aruba Global Travel Conference (AGTC) a trece hunto un total di 67 participante for di Merca, Canada, Latino America (Colombia, Brazil, Argentina, Chile, Pero, Equador y Paraguay), y Europa (Hulanda, Italia y Alemania). Banda di esaki hopi otro socio cu ta representa entre otro nos hotelnan tambe a biaha pa tey presente. Un total di 103 persona a bishita Aruba pa e siman aki. Ta e di dos biaha cu A.T.A. a combina e mercadonan mas clave pa nos isla, esta Norte America, Latino America y Europa den un solo siman. Pa decadanan a atende tur mercado separa pa medio di nan conferencia – riba e isla – dedica na nan. Hopi cos ta cambia den e mundo di turismo y A.TA. desde aña pasa a lansa un conferencia ‘global’ unda tur region ta presente.
Durante henter e siman, participantenan y socionan di mundo di turismo a gosa di intercambio productivo. E programa a cuminsa dialuna anochi cu un ceremonia di apertura, sigui pa presentacionnan clave diamars mainta durante di e Aruba Global Travel Conference den cual A.T.A. a enfoca riba fortalece e colaboracion entre lidernan di turismo, y a comparti e futuro di e industria di turismo di Aruba y su evolucion cual ta dirigi riba introduci aun mas accion cu ta cuadra cu e conceptonan di “Responsible Tourism” & “Regenerative Tourism”.
Entre otro a pone atencion na e “E Efecto di Aruba” – e evolucion di e capa di promocion y strategia di comunicacion internacional pa Aruba. A.T.A. lo sigui basa su strategia riba atrae e bishitante di balor halto. Lo stabilisa e crecemento den cantidad di ‘stayovers’ pa asina por dirigi y cambia e enfoke na atrae proporcionalmente mas bishitante cu no solamente un perfil economico desea, pero cu tin e mentalidad di tambe balora “Responsible Tourism”, cu ta contribui na nos economia, cu ta respeta nos cultura y medio ambiente, y ta proteha nos isla, Aruba. Stabilisacion lo ta un proceso gradual, unda lo yega e punto di no mas crecemento. “Protect It” lo bira parti integral di e strategia.
E programa a continua cu un Mercado Turistico (Marketplace) cu a tuma luga diaranson pa e mercado di Latino America, y diahuebs pa e mercado di Norte America y Europa. Durante e evento interactivo aki, participantenan a reuni cu ehecutivonan local den turismo. E Mercado Turistico a conta cu participacion di mas di 35 socio local, entre otro hotelnan, companianan di tour y otro operadornan turistico. Cada un di socionan aki tabata tin espacio pa 20 cita pa dia cu ehecutivonan internacional, caminda cu por a explora oportunidadnan di negoshi y establece relacionnan duradero.
Aparte di e reunionnan programa, invitadonan internacional por a gosa di diferente experencia rond di nos isla, y cumpli cu ‘site-inspection’ na diferente propiedad. Di e forma aki, a percura pa nan por ta bon ekipa cu informacion di futuro desaroyonan y di e producto turistico na Aruba.
E reaccion pa e segundo edicion di e Aruba Global Travel Conference ta sumamente positivo, tanto cerca stakeholders local como tambe cerca e participantenan internacional, cu a inclui varios persona cu a bishita Aruba pa promer biaha. A.T.A. ta optimista cu e siman a sirbi como un plataforma importante pa yuda nos isla logra metanan stipula, crea oportunidadnan nobo y asina enrikece nos mercadonan turistico.
