Su formacion ta un refleho di evolucion constante. Mas aleu cu un educacion tradicional su formacion tabata un biahe intelectual cu a laga Sammy Ocampo cu conocemento arkitectonico y artistico. Desde cu el a cuminsa na La Universidad Rafael Urdaneta (URU), na Maracaibo – Venezuela, el a dicidi di bira un arkitecto den buskeda constante di innovacion sin perde di bista su propio esencia. Sammy a sigui paso di su tata, Gerardo Ocampo, cu ta un arkitecto reconoci. E ta admira profundamente su inteligencia y su vision unico como arkitecto, capaz di transforma espacionan cu un marca inimitabel.
Sammy su entrada den arkitectura y diseño na Aruba tabata un evolucion natural di su pasion pa espacio y estetica. Desde jong e tabata sa cu arkitectura tabata su vocacion. Cu 11 aña mientras otro mucha tabata hunga, e tabata dal su prome pasonan den diseño cu su prome curso di AutoCAD. E inspiracion a bin ainda for di mas chikito ora su tata a dun’e un papel y potlood, permitiendo pa e laga su creatividad los sin limite. Desde e tempo ey, cada liña tabata parti di un pasion cu a nace for di tempran y converti den su profesion. Su fascinacion pa creacion di ambientenan funcional y bunita a hib’e na explora distinto influencia y tendencia.
El a descubri na e isla vibrante aki un conexion special cu su ambiente, luz, brisa y rikesa cultural, cual a inspir’e pa diseña proyectonan cu ta captura su esencia. Su enfoke arkitectonico ta refleha un interpretacion fresco y moderno di e esfera Caribeño, unda luz, funcionalidad y sostenibilidad ta alinea den un ekilibrio perfecto. Sammy Ocampo ta den Focus Digital Magazine di juni compartiendo loke mas e ta disfruta di e proceso di creacion. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
