Disciplina, determinacion y traha duro cu structura pa sobresali ta locual Ulises Maduro a siña for di tempo e tabata den little league. El a bay biba cu 14 aña na Hulanda, unda el a sigui hunga baseball y cu su fisico atletico el a haya oportunidad despues pa modela. Sinembargo e faceta di su bida cu e ta keda wak semper cu nostalgia y orguyo ta su añanan den Militaire Dienst. Ulises tabata un specialista di radar y observando un antena ta aparece tur anochi na cas di su buurman tabata inicio den radiodifusion. Awendia e ta comparti su conocemento den deporte combina cu musica den e popular programa Deporte 94 na HIT 94 FM.
Ulises na aña 2010 a bishita Aruba pa 6 siman y el a bolbe Hulanda cu heimwee. Na 2013 el a bisa su casa e tempo ey, cu e ta bin Aruba y si e haya trabou e no ta bolbe mas. Y dicho hecho, te dia di awe e ta hopi contento cu e oportunidadnan cu el a haya aki. El a biba 26 aña na Hulanda, pero Aruba ta su home sweet home unda el a nace y aki ta su lombrishi. E tabata bon, pero el a bay di bon pa miho.
Su dinamismo y balentia for di mucha a sigui den henter su trayecto for di deporte, modelahe, comercio te cu marinier. Ulises ta relata cu na Aruba el a forma parti di ekiponanan tanto den little league como senior league y prome cu el a drenta militaire dienst, el a hunga baseball den diferente ekipo di nivel den eredivisie y hoofdklasse. Door cu e tabata un power pitcher prospecto, el a experiencia cu ora bo ta riba nivel internacional, esey ta keda den bo mente pa resto di bo bida.
E similaridad entre deporte y modelahe riba cual area Ulises tabata activo di ‘90 pa ’92, ta pa ta den spotlight dilanti un audiencia grandi. E etapa como modelo ta un experiencia inolvidabel unda Ulises tabata sinti un gran satisfaccion ora e tabata wordo aplaudi y acerca pa haya saca potret. Sinembargo e ta corda cu nostalgia su añanan den mundo militar ora el a bira officier y despues sergeant. Door cu e tabata un specialista di radar el a biaha practicamente Europa completo.
Ulises Maduro su entrada den radiodifusion realmente a inicia na aña 2010. Ulises a bay cerca su buurman pa puntr’e dicon tin un antena ta subi y baha tur nochi. E tin curiosidad pa sa door cu frecuencia y radar ta su mundo. El a wordo invita pa drenta wak y el a descubri henter un radio stacion pirata. El a cuminsa train estilo pirata na e radio uzando den aire e nomber de zwarte ridder. E tabata toca Doble R y tur loke ta na Hulandes cu un toke di Caribe.
Na 2013 tempo Ulises a bolbe Aruba, el a join un canal como comentarista. Despues el a tuma 1 aña break, pero na december 2015 e ta bisa: “Mi a bisti mi stoute schoenen pa averigua rond stategicamente cua radio no tin deporte y mi a bin dal den HIT 94”. Riba 27 di december Ulises a manda un email pa Johnny Habibe (dfm) cual despues di 2 ora el a contesta si e por pasa pa su mayan. Asina el a inicia na HIT 94 cu Deporte 94 cual segun e tantisimo reaccionnan ta un programa invencibel.
Deporte 94 su acogida ta e concepto fresco y innovativo cu Ulises Maduro ta deleita e oyentenan di dialuna pa diabierna di 12’or pa 2’or di merdia. E seleccion di musica for di decada ’50 te cu ’90 y poco poco ta subi bay mas ariba tocando cancionnan nobo combina cu noticianan di deporte tin un tremendo acogida. E concepto di e programa na NOS cu yama “Langs de Lijn”, Ulises a bin Aruba cu ne door cu hopi tabata djis entrevista, keda papia 1 ora largo riba temanan cu e hendenan kisas sa caba.
E unico diferencia den Deporte 94 cu no tin hende ta ‘call in’ pero Ulises tin e weganan ya caba riba internet cu ta live. E ta comenta e weganan pa asina e oyentenan cu ta fanatico di deporte por sa kico ta pasado den mundo di futbol, tennis, basket, beisbol, darts, careda di cabay en otro live e momento ey combina cu musica. Lesa mas di Ulises Maduro den Focus Digital Magazine di juni, cu ta accesibel via Apple Store, Android Google Play Store y www.focus.aw (Menu Tab FOCUS DIGITAL)
