Aruba Airport Authority N.V. y Aruba Tourism Authority ta anuncia un vuelo directo nobo cu Porter Airlines for di Toronto y Ottawa pa Aruba, cuminsando den winter 2026. E vuelonan nobo cu Porter Airlines lo duna ciudadanonan di Aruba mas acceso directo entre Aruba y Canada durante temporada di winter, crea mas opcion di biahe cu menos conexion.
E vuelonan for di Toronto lo opera cinco biaha pa siman, mientras esunnan for di Ottawa lo opera dos biaha pa siman, uzando avionnan Embraer E195-E2. E rutanan nobo lo agrega aproximadamente 924 stoel adicional pa siman entre Aruba y Canada durante temporada di winter, duna pasaheronan mas acceso directo y cu mas flexibilidad. Toronto ta keda un di e centronan di biahe mas grandi di Canada, ofreciendo conexionnan facil pa destinacionnan rond di Norte America y internacionalmente. Ottawa, capital di Canada, tambe ta duna acceso facil pa regionnan cerca.
Pasaheronan cu bula cu Porter Airlines por disfruta di Wi-Fi di velocidad halto gratis, snacknan premium gratis y gosa di e configuracion conoci di Porter, esta cu no tin asiento memey den e filanan. Pasaheronan por scoge tambe pa PorterReserve, cu ta inclui mas espacio pa pia, check-in dedica, aborda mas tempran, maleta registra y cuminda fresco prepara riba vuelonan mas largo.
“Yama Porter Airlines bonbini na Aruba ta marca un adicion importante na nos red di rutanan y ta duna nos comunidad mas acceso directo na dos mercado clave di Canada,” asina Jonny Anderson, CEO di Aruba Airport, a bisa. “Tanto Toronto como Ottawa ta ofrece bon oportunidad di conexion y e vuelonan nobo aki ta yuda haci biahamento mas conveniente pa nos residentenan mientras nos ta sigui expande accesibilidad di Aruba.”
“Canada ta sigui di ta un mercado importante pa Aruba,” segun Ronella Croes, CEO di Aruba Tourism Authority. “Huespednan Canades tin e tendencia di keda Aruba mas largo, ta descubri mas di nos isla y asina ta contribui di forma significativo na nos economia local. E vuelo nobo aki di Porter Airlines ta sostene nos esfuersonan di diversificacion mientras ta mehora conexion y ta reenforsa nos enfoke riba turismo di balor halto cu ta beneficia nos comunidad.”
