E logro celebrando orguyosamente 10 aniversario di Metropolitan Manpower Services ta representa pa su propietaria, Julisa Kruydenhof, perseverancia, crecemento y fe. Dies aña di consistencia, adaptando na desafionan y siguiendo padilanti cu proposito, guia a traves di Dios. Den maneho di e forsa laboral rond di e isla a trece structura y confiabilidad, yudando negoshinan soluciona retonan di empleamento y operacional. Mientras ta crea oportunidadnan pa individuonan haya acceso na un empleo stabil. Julisa su trayecto ta refleha loke ta posibel pa medio di traha duro, fe y perseverancia sirbiendo como un ehempel y inspiracion pa e hende muhenan, entrepreneurs y young professionals na Aruba y den Caribe.
E logro aki no ta referi solamente na Metropolitan Manpower Services, pero tambe e trayecto recori pa Julisa Kruydenhof. Desde su inicio den e sector corporativo, pasando den horeca y despues haci un paso grandi den e mundo empresarial pa construi un agencia di empleamento, cu ta sostene otro empresanan lider na Aruba. Su trayectoria a ser forma a base di disciplina, resiliencia y crecemento. Awendia e ta ademas un mama di tres yiu, balansando liderazgo empresarial cu bida familiar, loke ta haci esaki mas significante ainda.
Julisa a traves di su compania a traha estrechamente cu resortnan, restaurantnan, companianan di construccion, comercio y companianan basa riba servicio. El a yuda nan soluciona retonan clave manera turnover halto, falta di structura y ineficiencia den e proceso di empleamento. Basa riba e experencianan aki, e ta ampliando su servicionan awor pa sostene empresarionan nobo, negoshantenan cu exceso di demanda di trabou y stagiairenan door di ofrece solucionnan practico, structura y guia pa yuda nan crece cu claridad y confiansa.
“Exito ta claridad, stabilidad y control”
Julisa Kruydenhof a crece na Hulanda unda el a biba y studia pa alrededor di 11 aña di su bida. Aya el a forma un fundeshi fuerte di structura, disciplina y independencia. Despues di a bolbe Aruba, e tabata ainda un adulto hoben cu hopi gana di sigui siña. El a gana experiencia den diferente industria administrativo y tambe hotelero prome cu el a drenta den e mundo empresarial. Julisa su reto di mas grandi den su prome aña tabata tanto credibilidad como recurso. E tabata un hoben recien yega for di mundo corporativo y di hospitalidad, drentando den un espacio unda confiansa ta esencial. Na mes momento, e negoshi a crece mas lihe cu nan a spera, locual a rekeri un compromiso financiero hopi grandi inmediatamente y habilidad pa maneha presion for di cuminsamento.
Locual a yuda Julisa den e periodo ey tabata su experiencia y su circulo di apoyo. Su background como Executive Human Resources Manager den un Resort Internacional hopi grandi, cu mas di 450 empleado, hunto cu su experencia como Secretaria/Accounts Receivables den un Trustkantoor grandi na Aruba. Esaki a dun’e structura, disciplina y conocemento operacional. El a traha tambe den varios departamento administrativo. E tin experiencia tambe como Restaurant Supervisor den departamento hotelero, loke a dun’e mas experiencia, aunke despues el a realisa cu su fortalesanan ta mas alinea cu ‘Management y Operation’. Restaurant no tabata e departamento unda e kier a sigui crece, pues e mester a haci e cambio.
Locual ta tene Julisa pasiona cu e industria aki despues di 10 aña ta e necesidad constante pa soluccionnan. Negoshinan ta sigui enfrenta desafionan cu personal, structura y sistemanan. Tambe pa por tin e capacidad di aporta claridad y soluccionnan practico pa empresarionan. Y hunto cu su team yuda candidatonan haya un trabao y mantene nan contento durante e transcurso cu nan ta den servicio cerca nan. Exito pa Julisa Kruydenhof ta nifica claridad, stabilidad y control. E ta construi algo cu ta crea oportunidadnan pa otronan y ta opera cu intencion, no caos. E ta nifica tambe cana den proposito y alinea su trabou cu su balornan.
Den Focus Digital Magazine di e luna aki, Julisa Kruydenhof ademas di comparti su trayecto profesional ta conta tambe con maternidad a influencia su identidad como un businesswoman. E revista ta accesibel gratis via Apple Store, Android Google PlayStore y www.focus.aw (Menu Tab FOCUS DIGITAL)
