Diseño di interior a cambia hopi den e ultimo añanan. Antes e hendenan tabata sinti cu nan mester a scoge un solo estilo y sigui esaki estrictamente. Awendia, e tendencianan ta hopi mas flexibel y personal. E mescla di estilonan a bira un di e formanan mas moderno pa diseña un cas, specialmente na luganan manera Aruba, unda naturalesa, luz y un estilo di bida relaha ta inspira espacionan mas autentico y cozy.
Sinembargo mescla estilo no ta nifica combina tur cos sin direccion. E yabi ta pa crea harmonia pa e espacio sinti balansa y no manera un collage visual. Rayson y Dalia Semeleer di Dalia Design Studio ta ilustra y splica precies cua ta e estilonan mas popular awendia. Desde e estilo minimalista sigui pa boho, coastal/beach style te na tropical moderno.
Awendia e espacionan mas atractivo no ta sigui un solo formula. E tendencia moderno ta pa combina estilonan di manera inteligente pa crea casnan mas personal y autentico, cu ta conecta cu Aruba.
POR EHEMPEL:
Minimalismo + Boho
Coastal + Tropical Moderno
Moderno + Artesanal
E combinacionnan ta permiti bo pa crea ambientenan cu ta sinti cozy, natural y menos rigido.
Diseño di interior moderno ta trata di crea espacionan cu ta sinti autentico y conecta cu e estilo di bida di cada persona. Pasobra na final, un cas bon diseña no ta djis mustra bunita… e ta transmiti tambe balans, personalidad y bienestar.
Na Aruba, unda naturalesa y e ambiente relaha ta forma parti di e bida diario, mescla estilonan manera minimalista, boho, coastal of tropical moderno por duna resultadonan bunita y unico.
Sinembargo, cua ta e eror mas comun ora di mescla estilo sin direccion y ekilibrio? Ademas di mustra desordena kico mas e ta kita for di e interior di bo cas? Lesa mas den Home Trends den Focus Digital Magazine di juni, cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
