JERMAINE HOWARD: “DISCIPLINA TA TUR COS”

Riba su fanpage “Hashtagboss” Jermaine Howard, fitness instructor y coach, ta comparti su consehonan y espontaneamente ta bisa cu e ta cambia un hende su curpa y su mente, paso esey ta su trabou mes mes. Jermaine a cuminsa modela tempo e tabatin 20 aña y eynan ta caminda cu el a inicia cu hisamento di peso. Despues di 13 aña el a haci su debut den su prome competencia di bodybuilding, Mr Aruba, caminda el a sali den e Top 6 como Beginner. Awendia e tin mas cu 20 competencia cu el a participa y pa e aña aki tin uno mas cual e kier want’e ainda secreto.

Jermaine ta conta den Focus Digital Magazine di e luna aki, e momento el a realisa cu bodybuilding tabata mas cu un hobby p’e tabata dia el a cuminsa bira obsesiona cu e resultado e tabata hayando. Esaki tabata door di su disciplina y ey ta caminda cu el a cuminsa haci esaki como su deporte. Tocante su filosofia di forsa, disciplina y transformacion e ta bisa: “Mi filosofia ta nunca give up. Hopi biaha mi no tin gana ni motivacion, pero mi disciplina ta esun cu ta pone mi lanta tur dia y cu consistencia den esaki ta locual ta haci cu e curpa ta transforma”.

JERMAINE HOWARD
Prome Atleta Pro di su Edad na Aruba|
Men’s Physique

Jermaine Howard ta revela den Focus Digital Magazine di september cua lo ta su siguiente capitulo como deportista. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)