Shelby Toppenberg y Ashton Lopez a conoce otro aproximadamente seis aña pasa. Un buki tabatin un papel special den e principio di nan historia: The Power of Now. Pa Ashton, e buki aki tabatin un impacto profundo riba su bida durante un temporada cu no tabata facil. Ora el a ripara cu Shelby tambe tabatin interes den e mesun buki, esey a hala su atencion. No tabata solamente pasobra nan tur dos a lesa e buki, pero door cu e buki aki a mustra algo mas profundo: curiosidad, self-awareness y un manera diferente di pensa. Nan relacion a inicia cu amistad y un interes sincero den otro. Como cu ambos tabata biba na diferente pais, hopi di nan contacto tabata riba distancia: yamadanan largo, combersacionnan profundo y pocopoco nan a cuminsa conoce otro di berdad.
Carera Profesional
Ashton su profesion ta enfoca riba crecemento, transformacion y creacion di balor. E ta entrepreneur, inversionista y strategic business transformation leader, cu un trayectoria den tecnologia, producto, operacion y crecemento. E ta combina vision empresarial, strategia y ehecucion pa crea balor, transforma organisacionnan y construi solucionnan cu por escala. Actualmente Ashton ta traha den mas cu 15 mercado entre Europa y Caribe, caminda su experiencia ta combina strategia, operacion, finanzas, mercadeo, benta y liderazgo. Su balor agrega ta den e manera cu e ta conecta e area ey pa yuda e hendenan y organisacionnan move di idea pa accion y di accion pa resultado. Su filosofia ta simpel: yuda hende y organisacionnan pa florece.
E carera profesional di Shelby ta den Finance & Accounting cual el a studia na Universidad di Aruba. Actualmente e ta traha na Ministerie van Financiën den e departamento di Directie Begrotingszaken, caminda structura, precision y responsabilidad ta forma parti di su mundo diario. Pafo di e cifranan, creatividad semper tabata mes importante p’e. Pa mas cu 12 aña, e ta traha como makeup artist, desaroyando su pasion pa beyesa como un parti profesional di su carera. Awor e ta enfoca riba expande e parti ey, combinando beyesa y creatividad cu ambicion. E ta stima crea, inspira confiansa y construi algo cu berdaderamente ta refleh’e.
Proposion & Matrimonio
E proposicion a pasa na Barcelona, unda Ashton a organisa un guia y fotografo, aparentemente pa un family photoshoot. Nan a desayuna, bishita diferente luga y saca potret di famia. Pero tur cos tabata parti di e plan. Durante e sesion, Ashton a baha riba un rudia y a pidi Shelby pa casa cu ne. Na e mesun momento, su mama y su rumannan a aparece como sorpresa. Pero pa Ashton, tabata importante pa Shazia tambe forma parti di e promesa. Banda di Shelby su renchi, Shazia a haya renchi di orea cu diamante, matching pieces cu e renchi di su mama. E significado tabata simpel pero profundo: “Nos no tabata solamente formando un matrimonio. Nos tabata formando un famia”.
E celebracion di e matrimonio di Ashton y Shelby na Medellin, Colombia, tabata un experienica cu nan lo no lubida nunca. Nan a organisa practicamente tur cos for di Hulanda y nan a yega Colombia dies dia prome pa ta sigur cu tur detaye tabata cla. Nan kier a crea algo cu no tabata solamente un wedding, pero un experiencia caminda e invitadonan por a sinti, mira, tende y forma parti di nan historia hunto. E ceremonia tabata intencional, intimo y hopi special. Pa Shelby, tabata special pa wak hopi di e cosnan cu e tabata soña cu ne bira realidad. Pa Ashton, e momento a toc’e mas profundo tabata ora el a wak tur hende dilanti di dje, tende e musica, mira e bunitesa rond di nan y sinti e bendicion di Dios. E no por a tene su emocionnan… E lagrimanan tabata lagrima di gratitud.
Ashton Lopez y Shelby Toppenberg, Sr. & Sra. Lopez, ta ilustra e portada di Focus Digital Magazine di september y ta comparti e momentonan mas special di nan enlace matrimonial acompaña pa un serie di potret espectacular. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
