E prome biaha cu Zia Habibe a forma parti di Aruba Art Fair tabata aña pasa y e ta yen di entusiasmo pa haci “live paintings” e weekend aki atrobe den caya di San Nicolas. Pintando en bibo ta algo completamente diferente y Art Fair tabata e prome biaha unda Zia a pinta e hendenan al instante. Esaki ta exigi como artista cu e mester ta sigur cual material scoge y ki estilo ta bay pinta door cu e ta mara na tempo. E ta encanta cu a traves di pintamento e por mescla mundo real y mundo di fantasia.
Zia ta disfruta conecta cu e personanan ora nan ta su dilanti sinta pa e por capta nan personalidad. E ta haya importante pa tin e sintimento di e persona den e fase di sketch pa asina e por sigui pinta trankil sin mester haci mucho cambio, y pa e persona tambe por reconoce su mes den e pintura. Ora e tin un persona of pareha su dilanti e ta puntra nan: “Ki pose bo(so) prefera pa mi pinta?”. Y esey caba ta yud’e sketch, paso e ta puntrando e persona kico e mes ta sinti. Tin hende cu kier un pintura romantico y otronan cu kier un pintura mas laidback, lief of pret.
Su miho experiencia pintando na Art Fair 2025 den caya di San Nicolas tabata cu su booth tabata semper yen! Door cu tabata su prome biaha e no tabata sa con e lo bay, pero el a hay’e asina bunita con e personanan cu a bin su booth a dun’e chens pa pinta nan. “Hopi persona no conoce mi arte, dus mi ta haya hopi nice cu nan a ‘give it a shot’. E ta un bunita recuerdo y mi ta sinti great ora mi por pinta un persona su esencia. E satisfaccion ora un persona gusta e pintura cu mi ta haci di nan, paso mi ta echt sigura cu mi ta wak tur detaye”, ta expresion di Zia di su experiencia aña pasa.
Zia Alexia ta na Aruba Art Fair 2026 e weekend aki y ta haci un invitacion pa pasa na su booth B14. Por puntra pa wordo pinta como bo Disney Princess faborito of favorite anime character. Zia ta corda cu aña pasa tabata super leuk, paso e por a sinti con contento e personanan tabata ora el a caba di pinta nan. E ta algo bunita pa por crea un memoria ‘timeless’ di un persona via un sketch.
