E trayectoria profesional di Jayburtt Dijkhoff a bay di studioso, pa experto, pa awor “rediseñador” di sistema. E no ta djis wak mas di con e sistema ta faya. Awore ta traha na con nos por haci e sistema di salud y gobierno, y e institutonan, traha miho pa hende. Awor e tin un yamada pa empodera esunnan mas vulnerabel y crea un brug a traves di cursonan y proyectonan cu Fundacion SIKI y su centro nobo: Pashentnan di Aruba (PDA). Jayburtt ta autor di dos buki, “E derechonan di pashent” y “Ken ta mi Tata: E abraso perdi”.
Pa “E derechonan di pashent” e buki aki ta trata un necesidad basico. Jayburtt a mira hopi hende no sa cua ta nan derechonan. Es mas, hopi hende no sa mes por ehempel cu nan mag pidi un copia di nan file medico of pidi un segundo opinion medico. P’esey e buki aki ta facil pa lesa y cu hopi caso di bida real. E di dos buki ta yama “Ken ta mi Tata: E abraso perdi.” E idea a nace for su duele di a perde su tata. Su tata a cont’e hopi di su bida y el a yega di skirbi un manuscrito di su bida tambe.
Jayburtt a pensa pa pone su storia riba papel y den e proceso compronde miho ken su tata tabata p’e. Tambe e kier a compronde ken ta famia Dijkhoff en realidad? Pero tambe e ta toca e pregunta unda nos ta pertenece, ki tipo di persona nos kier ta, y kico nos ta scoge pa e siguiente generacion. E ta un buki pa sa mas di famia Dijkhoff na Aruba, su tata y su mes como persona. Pasobra e ta hiba e lesado a traves di su mesun proceso di procesa duele pa un ser stima cu a bay sosega.
Personalmente e parti mas dificil no ta e idea ni e skirbimento mes. Pa Jayburtt e parti mas dificil ta visualisa kico e buki mester encera y kico ta keda afo. El a yega di skirbi buki masha diki, pero pa e mercado e ta purba di skirbi buki cu ta facil y dushi pa lesa. Ademas di su experiencia como autor, Jayburtt Dijkhoff ta conta cu e tin plannan grandi y cual ta su siguiente capitulo cerando uno di biba bou di sombra di otro. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
