Un di e tendencianan cu a surgi y haya hopi fans di e look aki, e popular ‘shower makeup’ cu ta un makiyahe cu ta parce manera cu bo a caba di sali for di douche.
Con pa crea Shower Makeup?
Huda Kattan cu ta un makeup artist, beauty blogger, entrepreneur y fundado di e linea di cosmetico Huda Beauty, a splica paso pa paso con recrea e shower makeup, splicando cu un di e clavenan pa logra cu exito e tendencia aki, ta observa e puntonan di luz di e cara y unda naturalmente nos ta ‘briya’, di e manera aki e efecto ta mustra mas autentico.
El a comenta cu e puntonan di luz aki ta logra utilizando un corector cu ta un of dos tono mas cla cu e color di e cutis, cu e aplicacion mester simula e iluminacion for di ariba pa abou riba e cara, pero prome ta hopi importante e preparacion di e cara pa e shower makeup.
E shower makeup ta enfoca riba cutis cu bon coreccion, lipnan hidrata y hopi enfasis riba iluminacion di e cuero, dunando un efecto muha, ademas di mustra un cara sano, e ta parce makeup di pasarela di moda, p’esey no ta nada straño cu e ta wordo hopi recomenda.
Pa e tendencia funciona y e luz sobresali, mester prepara e cara cu un serum cu ta retene e humedad natural y seya cu un crema hidratante, cu segun Huda ta bisa pa uza un base di makiyahe no pisa pero mas awa cu un poco di corector suave pa coregi e imperfeccionnan. E exito di shower makeup ta depende na e highlight likido cu ta duna e textura y apariencia di e cutis muha. Segun e guru di beyesa Huda, e apariencia di e cara ora di sali for di douche, ora ainda e ta muha, ta mustra hopi atractivo, esey a inspir’e pa crea shower makeup, cu e usarionan di e plataforma di TikTok a gusta masha hopi y comparti esaki.
