Un hende muher cu ‘gold fingers’ y un imaginacion fabuloso awe ta cumpli 60 aña, y su Birthday Party tabata simplemente ESPECTACULAR! Un anochi cu un super bon ambiente yena di alegria, baile y goso unda tur e invitadonan a disfruta den aire liber cant’i lama na Aruba Ocean Villas, cu tabata decora cu e caracteristicanan di Disney.
Osyth Henriquez ta conoci pa un dama emprendedora, semper cu un sonrisa riba su cara y brindando un trato masha caluroso y cordial. Loke cu por remarca ta cu e decoracion di su fiesta ta un refleho di parti di su trayectoria como entrepreneur, como e prome persona y hende muher cu a licensia su piñatanan na Disney World: Mickey, Minnie, Pluto, Daisy y Donald. Osyth a conta ayera nochi den un estilo masha perculiar, cu ora Jonathan a bise pa haci un fiesta di Piñata. El a conteste: “Den serio bo kier haci un fiesta di piñata?”
Osyth den su mensahe a comparti parti di su retonan den bida, pero loke mas el a pone enfasis riba dje ta; siña aprecia arte y cu semper nos mester stima y respeta otro. Su yiu, Jonathan Vieira, tambe a hiba un speech cortico bisando cu aunke e por conta mil y un cos di su mama, pero den tiki palabra e por bisa cu mirando su dos rumannan homber, con bon nan a ‘turn out’, esey ta bisa tur cos di su mama y resto cos ta ‘bijzaak’.
E personanan cu tabatin e honor di a comparti cu Osyth e celebracion di su cumpleaño, sigur a disfruta di un di e miho fiestanan di e aña aki. Tur e ingredientenan cu ta haci un fiesta exitoso nan a tene na cuenta, for di e buffet, bar, decoracion y musica, cu e tremendo presentacion di Sandunga y Robert y Su Solo Banda. Un anochi cu a hiba e invitadonan bek den tempo y faltando 5 minuut pa 12or di anochi, Jonathan a yama e primo- y primanan pa hunto kibra e grandioso piñata. Pabien Osyth!
