E cabesante y maestronan di Fatima College hunto cu e representantenan di Aruba Tourism Authority tabatin un secreto grandi bon scondi pa e alumnonan di e scol. E tabata manera un explosion di alegria, ora cu e alumnonan a haya e bishita inespera mainta trempan di e tripulantenan di Caribbean Princess y Santa Claus.

Santa Claus y su ayudantenan a cana drenta e scol cu nan mannan yen di regalo, y cu hopi alegria e alumnonan a topa nan. E gerente encarga cu recursonan humano pa e crucero Caribbean Princess a splica cu esaki ta su prome bishita na Aruba y el a goza di e reaccion. El a sigui bisa cu p’e, e ‘Holiday Gift Project’ di Florida Caribbean Cruise Association (FCCA) ta un experiencia fantastico, mirando e caranan contento di e alumnonan. Ademas, e tabata un momento unico pa comparti cu e comunidad di Aruba.

E proyecto riba su mes ta existi mundialmente ya pa mas cu 20 aña y tur isla cu e cruceronan di FCCA ta bishita, conoce e ‘Holiday Gift Project’. Esaki ta un di e gestonan di parti di FCCA pa expresa nan gratitud na e comunidadnan, cu ta brinda hospitalidad na nan huespednan y ta coopera cu tur e liñanan crucero cu ta miembro. Na cada waf, e tripulacion di diferente barco di FCCA a entrega mas cu 200 regalo hunto cu Santa Claus durante nan bishita na un instancia, organisacion of scol.

Kimberley Richardson y Marouska Heyliger di Aruba Tourism Authority a percura pa e proyecto sali exitoso y a hiba palabra di gradicimento na e tripulantenan di Caribbean Princess.

LEAVE A REPLY

Please enter your comment!
Please enter your name here