Nos tarea ta pa informa, alerta y educa e comunidad na Aruba. Nos kier pone abo como lector altanto di tur locual cu a pasa rond mundo, riba tereno di economia, politica, tecnologia y e tragedianan den 2018.
Aña 2018 ta habri cu e gran noticia cu Oprah Winfrey lo postula su mes como candidato presidencial 2020. Esaki a crea un ‘head-line’ riba e canalnan di social media. Despues di un entrevista exclusivo cu Vogue Magazine, Oprah ta desmenti esaki.
Comite Olimpico Internacional a dicidi pa honra bek e miembrecia di Rusia. Esaki a haya prohibicion na e Winter Olympics 2018, debi na un escandalo di doping. E condicion pa duna e miembrecia bek tabata cu, ningun atleta por test positivo pa doping.
A keda raporta cu e yiu homber di Fidel Castro; Fidel Castro Diaz-Balart a comete suicidio na edad di 68 aña. Castro tabata haya tratamento pa depresion. Na bida e tabata e yiu homber mayor di Fidel y tabata traha como Cientifico Nuclear.
Mark Zuckerberg mester a aparece dilanti Parlamento Mericano, pa duna cuenta riba ‘leak’ informacion di 87 miyon usuario di Facebook, cu nan a comparti na un manera inapropia. Zuckerberg a priminti pa drecha e eror aki y traha riba e credibilidad di Facebook.
Cuba – Vuelo 972
E avion ‘Cubana de Aviacion Flight 972’ a cay na Cuba, pa un eror humano matando asina 112 pasahero cu excepcion di un dama. A traslada e dama aki cu urgencia den un estado critico. Cuba a declara dos dia di luto.
Netflix a anuncia cu nan a yega 125 miyon usario. Cu e logro aki ta demostra cu Netflix ta creciendo na un manera agresivo riba nivel internacional. Pa 2018 so Netflix a produci 18 serie nobo, agrega 11 seasons nobo na serie existente y 14 pelicula nobo.
E volcan Kīlauea ta esun di mas activo na Hawaii. Desde su erupcion na 1983, esaki tabata keto. Den 2018 a bolbe haci un erupcion grandi, evacuando asina mas di 2000 persona for di nan hogar. E volcan a causa daña ireparabel na e isla di Hawaii.
Tiroteo – California
Merca a keda sacudi un biaha mas pa un tiroteo na un lugar publico. E biaha aki tabata na California lagando un saldo di 12 morto atras. Ian David a drenta Borderline Bar & Restaurant y a cuminsa tira riba tur esnan presente. Despues el a tira su mes.
United States Congress
Por a vota pa un total di 470 asiento; 35 asiento pa Senador y 435 asiento pa Parlamento. E Democratanan a gana control di Parlamento, mientras cu e Republicanonan a retene control di e asientonan pa Senador. Un eleccion cu a marca historia, ya cu pa prome biaha tabatin un diversidad completo di religion, sexo y creencia.
Pa e ultimo añanan Samsung ta buscando un innovacion, pa locual ta trata Smartphones. Pa hopi tempo caba no tin innovacion riba e tereno aki y esey ta bisto den e cifranan di benta. Segun Samsung un pantaya ‘foldable’ lo ta e siguiente innovacion pa Smartphones. Tanto Samsung y e otro companianan ta kere cu un pantaya ‘foldable’ ta mas placentero y versatil pa traha cu ne. Den 2019, nos lo wak innovacion sigur riba e tereno aki.
Mundo a uni pa hunto biba e momentonan magico di Copa Mundial. A pesar cu Hulanda y Italia no a clasifica pa hunga Copa Mundial, aki na Aruba hopi ta esnan cu a uni nan mes na e fanaticada di Alemania, Argentina, Colombia, Brazil of Francia. Na final Francia a titula campeon Copa Mundial 2018. E siguiente cede di Copa Mundial 2022 ta na Qatar.
