Cu carnaval 65 den su momento mas excitante cu e paradanan tan spera unda e explosion di creatividad, alegria y spontanidad ta reina na Aruba, ta interesante pa trece loke algun di e reinanan cu a haci historia, a expresa tocante nan anectoda- y recuerdonan memorabel. En conexion cu e celebracion di 65 aniversario di Aruba su Carnaval, revista FOCUS a enfoca su edicion di februari riba diferente di e reinanan cu a haci historia durante e añanan cu a transcuri. Un parti chikito di cada reportahe ta comparti riba e website y den e revista por lesa henter e cobertura.
REINA DOBBEL CORONA
HELENE CROES
YOUTH CARNIVAL QUEEN 1974
ARUBA CARNIVAL QUEEN 1977
E momento cu a eligi Helene Croes como Reina Hubenil 1974, e no por a kere, door cu e tempo ey semper tabata e clubnan grandi tabata sali reina.
E tabata su prome experiencia tanto riba stage como den publico y riba carosa, cu tabata un experiencia hopi dushi y inolvidabel. Despues di 3 aña e tabata bek riba stage representado Club Caiquetio un biaha mas, pa competi pa e corona di Reina Grandi di Carnaval 1977. El a logra trece e corona pa su club y esaki nan a celebra en grande, hunto cu su gran fanaticada.
Pa Helene e reinanan cu un gran impacto den e 65 añanan ta e di 2 Reina di Carnaval, Olga Wong Tromp na aña 1956, cu awor ta su suegra y Enid Croes- Marugg. Ainda tur dos ta luci semper manera un reina, a pesar di nan edad. Natasha Felix cu a bin cu un disfraz enbes di bisti blanco. Defunto Marjorie Flemming cu su shownan, Defunto Pamela Brown cu tabata un mucha muhe bunita y simpel, cu a representa un districto y no un club. Veroushka Croes cu tambe despues di aña a trece e titulo pa districto di Paradera.
E CAS DI REINA
MARIANA ODUBER – WERLEMAN
YOUTH QUEEN 1976
GOSSY-ANN ODUBER
CHILDREN QUEEN 1997
GILLIANY BRIESEN – ODUBER
YOUTH QUEEN 2014
Na aña 1976 Mariana Oduber Werleman a conkista e titulo di Youth Queen 1976, despues cu el a participa na eleccion di Reina Hubenil, representando Amity Organization. Tur cos tabata basa riba aparencia hubenil; tanto e presentacion como e shimis. E candidata ta riba escenario pa representa e hobennan, pues e mester keda mustra hubenil. E aña ey nan tabata 18 candidata cu a participa na e eleccion. Preparacion e tempo ey tabata minino compara cu awendia. Locual Mariana ta corda tambe ta, cu apoyo e anochi di eleccion tabata conta den e puntuacion.
Despues cu su 2 yiunan e tabata ful diferente. E por hasta bisa cu, e ta un diferencia super grandi. Cu experiencia cu cada yiu tabata diferente momento cu nan ta bay scoge reina. Cu Gossy-Ann na 1997e ta corda cu el a core subi stage pa braz’e y felicit’e. Y tempo di Gilliany el a bay sconde den auto, pa despues nan bin rondia unda e ta y hibe bek den stadion. Ta momento cu lo e no lubida. Y e ta un mama super contento cu tur 2 a logra conkista e corona den nan eleccion.
REINA DEN SANGER
ANKIE BRUIN
YOUTH CARNIVAL QUEEN 1966
ELISABETH BRUIN
YOUTH CARNIVAL QUEEN 1968
JOANNE BRUIN
CHILDREN CARNIVAL QUEEN 1987
MONICA NUCETE
YOUTH CARNIVAL QUEEN 1995
Den cada famia uno ta hereda cierto caracteristicanan di otro. Esey no ta excepcion den famia Bruin, unda cu e hende muhernan a logra conkista diferente titulo di Reina di Carnaval den transcurso di decada. Un fenomeno masha usual ta ora un mama, tanta of wela a bay pa reina, e siguiente generacion tambe ta sigui den e pasonan aki. Den e caso aki nos ta papia di mama, yiu y prima cu sigur cada un a disfruta di nan periodo como Reina di Carnaval. Ankie, Elisabeth y Monica a representa Aruba Tivoli Club y Joanne a representa Oranjestad.
Cada un tin un anectoda unico cu nan ta corda y pa Ankie esaki tabata nada agradabel door di un fayo na su carosa. Esaki a kibra, bente abou, di cual el a perde conocimento y den ambulans el a bay hospital, basta grave cu sangramento paden. Tabatin basta confusion e dia ey cu e noticia cu el a fayece y p’esey na entrada di e parada den Nassaustraat, ful e grupo di Tivoli a sali bay club, pero manera e ta bisa semper cu danki Dios tabatin un final feliz.
Pa Elizabeth ta recuerdonan dushi preparando pa nos Carnaval na aña 1968 unda nan a representa e tema di Chines. Joanne ta corda con e anochi di su coronacion henter e stock cu su mama tabatin ta spaar pa su prome santa comunion a bay ful. Na 1995 e cantica “Saca e Boem Boem” tabata hot y como reina Monica no tabatin mag di ‘hit the floor’ . Despues di Lighting Parade su mama y su tantanan a hibe hunto cu algun amistad Club Visage, pa e por ‘hit the floor’, sin cu ningun hende por a reconoce!
REINA TRIPEL CORONA
MARIBEL ANDRADE
CHILDREN CARNIVAL QUEEN 1994
YOUTH CARNIVAL QUEEN 2002
ARUBA CARNIVAL QUEEN 2010
Maribel Andrade ta e prome Reina di Tripel Corona di e celebracion grandi di Aruba su Carnaval. For di momento cu Maribel a gana Reina Infantil, el a sigui pa e siguiente categoria den Eleccion di Reina. Maribel ta corda cu el a gusta e anochi masha, bailando y presentando riba stage. Como mucha, e tabata un anochi sin stres, paso e no tabata compronde mucho bon e peso di eleccion. Su speech a bay super bon, cu te dia di awe Maribel ta cord’e y e show su tema tabata Barbie.
E di dos corona, esta di Youth Queen, Maribel a gosa di ful e temporada di Carnaval masha hopi mes. E biaha aki si Maribel tabata compronde tur cos y e tabata kier a bay cu e corona, pues el a dedica hopi tempo na memorisa su speech y train tur su bailenan. El a bira un meta pa cumpli pa participa despues pa Reina di Carnaval mirando, cu el a disfruta asina hopi di e dos otro eleccionnan. E kier a haya e oportunidad di bolbe experencia esaki un biaha mas. El a haya great tambe cu e tabatin e chens di logra ta e prome mucha muher na Aruba pa gana tur tres titulo.
Un anectoda cu Maribel ta corda tabata cudurante e Eleccion di Reina Hubenil e tabata hopi nervioso durante e premiacion. N’e momento cu e tabata riba stage bailando y wardando resultado, el a bira lomba pa publico y puntra e prins hubenil di e tempo ey, Ronwayne Kock, si el a gana. El a bise cu e no sa ainda. El a sigui baila, pero despues el a bolbe bira y hacie e mesun pregunta. E biaha aki si el a contesta Maribel cu si. El keda trankil y sigui baila. Unabes nan a hisa su man el a cuminsa bula y celebra.
FAMIA DI REINA
RACHELE ODUBER
Carnival Queen 2001
ZIZIANE FLEMMING
Carnival Queen 2004
ERIALDA CROES
1st R-UP Carnival Queen 2009
ZURIAH FLEMMING
Carnival Queen 2014
Esun mas grandi di e cuater primanan cu a competi pa Reina di Carnaval tabata Rachele Oduber y el a gana e corona na aña 2001. E tarea cu el a asumi despues tabata esun di ‘apoyo manager’ y por mir’e cu su loudspeaker, apoyando hunto cu e fanaticada, cu tabata yega masalmente pa apoya su primanan. Pa e gran celebracion di Carnaval 50, e famia a duna e apoyo y sosten total den tur forma na Ziziane Flemming, pa e trece e corona aki cas. Ya Zuriah tabata mas grandi y tabata presente den e preparacionnan y ta corda basta cos, mescos tambe tempo cu Erialda Croes a participa na 2009, unda el a bira e 1st Runner-up Carnival Queen 2009.
Cu e experiencia acumula, e primanan tabata hopi bon prepara, momento cu Zuriah Flemming a competi pa e corona di Reina pa e Celebracion di Carnaval 60. Cu hopi tips di con pa baila, papia y presenta su mes y esun mas flexibel pa core riba-bou pa yuda cu tur loke por, Erialda a duna su sosten na Zuriah, ya cu Ziziane a bay Colombia, net e dia ey di Eleccion di Reina, pa tratamento di bestraling. Sinembargo nada no a pas’e y tabata altanto di tur cos. E no a sinti ningun dia cu el a ‘miss’ algo, paso su famia- y amistadnan a percura, pa e por a sinti y tabata presente den mente na tur momento. Un detaye cu el a aprecia masha hopi mes ta, cu dia di eleccion, su primanan a print un potret di dje pone riba un borchi y bay stadion cu ne.
E miho momento como Reina pa Rachele tabata e aplauso di e publico, cu e tabata ricibi durante e parada. Otro momento ta cu memey di parada na Playa, Sr. Barros di Texaco, a regale un auto, eseynan tabata algo inolvidabel. Pa Ziziane ta ora el a subi stage y a wak e blaasnan geel so den stadion, paso semper e tabata kier pa un publico grandi pa apoye y dune nan sosten. E miho momento pa Erialda tabata e momento di su presentacion oficial, cu el a subi e pasarela parti dilanti y saluda ful su famia y amistadnan cu tabata bulando y gritando, e tabata un sentimento unico y special. Pa Zuriah tabata e bunita comentarionan ricibi y durante parada con el a wordo acepta como nan Reina di Carnaval 60.
