Cuaresma ta nifica “cuarenta” y manera gran mayoria di nos hendenan a lanta cu e tradicion aki, ta aplic’e pa 40 dia di preparacion intensivo pa e fiesta di Pasco Grandi. 40 Dia ta un number simbolico cu ta expresa vispera ‘preparacion’ intenso di algo importante. Den e prome temponan, Cuaresma tabata un periodo di preparacion intensivo pa bautismo, cu ta exigi un coherencia y un cambio di mentalidad y actitud. Na Aruba a pesar cu tin diferente religion, hopi hende ta considera e periodo aki como uno di reflexion y ta haci cierto ayuno of abstinencia.
John Franklin Flemming
Funcion: Coordinador y consehero riba tereno di Cultura di Minister di Finansa Asuntonan Economico y Cultura
Kico Cuaresma ta nifica pa bo?
Cuaresma ta nifica pa mi, un parti grandi cu nos ta biba cu tanto e historia, bida y pasion di Cristo Hesus durante e 40 dianan.
Candy Dirkz
Funcion: Docente di Papiamento
Kico Cuaresma ta nifica pa bo?
Cuaresma ta un periodo di reflexion. Un periodo cu bo ta respeta y duna su luga. Un periodo cu hopi hende ta bishita misa mas hopi y ta resa mas.
Setty Christiaans-Yarzagaray
Funcion: Parlamentario Fraccion MEP
Kico e temporada di Cuaresma ta nifica pa bo?
Un temporada di respet pa bida, pero tambe pa ta gradecido pa loke Dios ta duna nos. Momento pa reflexiona riba e cosnan cu nos tin y cu tin ora nos ta “take for granted” y riba e cosnan cu ami a haci, cu por ta menos bon y cu sacrificio ta desea di mustra arepentimento y deseo pa drecha esakinan.
Charline Croes
Funcion: Administratie Medewerkster AZV
Kico Cuaresma ta nifica pa bo?
Cuaresma pa mi ta e periodo religioso di e Fe Catolico di 6x siman prome cu Pasco di Resureccion, durante cual ami ta reflexiona riba e ultimo dianan di Cristo Hesus su bida, su obediencia na su Tata, Nos Dios creador. E enorme sufrimento cu Cristo Hesus a sufri pa nos tur pecador. E sacrificio a simbolisa E como persona perfecto cu a sacrifica su mes, pa e desobediencia di 2 persona perfecto cu tabata Adam y Eva.
