Den edicion di FOCUS di october tin varios pagina dedica na conscientisacion con pa trata y cuida e animalnan. Por resumi e palabra mascota cu dos palabra potente: Amor Incondicional. E amor aki ta locual Lola ta representa den hogar di famia Caralps y pa su doño Claudia, cu ta esun mas jong den cas. Nan tres mascotanan: Lola, Luca y Alpha ta sumamente importante pa cada un di nan y semper ta band’i nan den nan rutina diario. Sinembargo pa e photo shooting a opta pa scoge Lola, door cu e ta esun mas trankil y cu ta gusta pose pa saca potret. Claudia ta conta anectodanan cu su cachonan di rasa Dachshund.
Animal Health Veterinary Hospital
Nan a bin ta promoviendo pa ta doño responsabel cu nan cliente- y bishitantenan, sperando un dia cu tur e cosnan relaciona cu negligencia di e animalnan ta bira poco comun. Nan ta duna varios conseho- y ideanan, prome cu trece un mascota den bo hogar: Adopta prome cu cumpra – E ta awor bo responsabilidad – Respecto espacio y ambiente –
Relacion cu estilo di bida – Respecto finanzas.
Dierenarts Veterinary Aruba
Nan ta di opinion cu lamentablemente door di falta di conocemento tin hopi negligencia di bestia na Aruba. Hopi hende cu tin un mascota kiermen djis dun’e cuminda so y esaki no ta e caso. Tin hopi cos cu bestia mester: awa limpi y cuminda, un dak unda nan por sconde fo’i solo y yobida, proteccion contra carpata y purga, proteccion contra bichi di curason, cuido veterinario; vacuna y chekeo anual.
Sgt. Pepper’s Friends
E ta un organisacion no lucrativo di rescata animal y ta situa na Aruba for di inicio di 2015. E fundacion ta enfoca riba rescata animal y contribui na crea conscientisacion pa e cuido di animal en general, door di promove castracion y sterilisacion y educacion di e hobennan. Nan a haya un hogar pa mas di 1200 cacho y pushi, cu ayudo di nan network social grandi. Pa aña nan tin un averahe di 125+ animal den nan cuido y ta castra y sterilisa hopi bestia di caya semanalmente.
