George Winderdaal ta hopi emociona cu e lansamento di su proyecto nobo “Intimamente cu G” na Dutch Caribbean TV. Su prome invitado ta un persona hopi special cu e conoce ya caba pa mas di 18 aña. E relacion di trabou a bira uno di amistad y awor ya casi famia, conoci den e mundo di farandula como Tanchi Esme. E lo ta combersando cu Esmeralda Tromp Jacobs, cu lo conta hopi cos bunita di su bida y su momentonan tambe di hopi dolor.

E programa aki George tabatin ya algun aña caba den plan, pero manera ta su pensamento cu e tempo di Dios ta perfecto. Esaki ta e momento pa lansa e proyecto di TV “Intimamente cu G”! E inspiracion pa presenta un programa den e estilo aki ta inicia for di tempo cu e tabatin un serie di 7 programa na Tele Aruba na 1998. George ta conoci como ‘Tio George’ pa su programanan di mucha y den e mundo di beyesa cu e certamen di Miss Teen International Aruba. Sin embargo e gusta explora tur tereno y di eynan e idea aki a nace pa haci un programa di entrevista, unda lo conoce e entrevistado den un rol un poco mas personal di su bida publico.

Riba nos pregunta con George mes a experimenta e cambionan ultimamente den su bida, el a contesta: “Ufff… asina hopi cos, tanto positivo como negativo, pero di esnan negativo nos ta siña y naturalmente di esnan positivo nos ta wanta na nan. Mi tabatin hopi challenge di salud den e ultimo añanan, pero mi por bisa Danki Dios e aña aki a bay basta bon. Mi a perde 40 kilo y ainda tin hopi mas pa bay, pero mi ta kere esey ta pa un otro entrevista (Hahaha).

Aparte cu bo ta entrevista bo invitadonan, bo mes lo conta bo storia personal?

Si claro esey tabata pensa caba di ‘Day 1’, cu den e ultimo programa di e prome temporada mi ta bay conta: “George… E bida no publico di Tio George”, dus mi mes lo entrevista mi mes. E lo ta super interesante!

Un invitacion special pa sigui e programa “Intimamente cu G” cu den e prome temporada ta pasa tur diaranson di 6:30 pa 7:00 pm via Dutch Caribbean TV pa Aruba ta Canal 55. E por wordo mira tambe na Bonaire y Curacao, y despues lo tin su ripiticion. Diahuebs lo load e programa tambe riba nan Pagina di Facebook yama “ Intimamente cu G”.

LEAVE A REPLY

Please enter your comment!
Please enter your name here