Ysaura Wong no ta un persona desconoci den e mundo di beyesa na Aruba. El a competi den e certamen Miss Teen Aruba 2001 y a keda cu e titulo di Miss Teen International. Ysaura a bay representa Aruba den exterior y el a gana Miss Teen American Continent, despues a logra Miss Aruba International el a representa Aruba na Hapon. Na 2011 bao halanan di GLW Foundation, Ysaura a competi den su prome competencia como Sra y aki a keda como Sra. Milenium. Na aña 2012 Ysaura a representa Aruba un biaha mas na Rusia y e biaha aki den e concurso di Mrs. Universe, unda el a keda como Mrs. Universe LTD. Ysaura cu e titulo aki a bira imagen di e certamen y esey a duna Aruba e oportunidad di organisa e concurso na 2013 aki na nos isla unda mas di 33 pais a participa.
Despues di a tuma un break den e mundo di beyesa pa atende cu asuntonan di salud di su yiu muher, awor Ysaura ta sinti su mes cla atrobe pa un otro reto y ta conta 100% cu apoyo di su casa y yiunan den e proyecto aki. Ysaura ta representando nos dushi isla di Aruba na Las Vegas den e concurso di Mrs. World unda tin mas cu 50 pais ta competi. E competencia lo tuma lugar diabierna 6 di December na Westgate Resort na Las Vegas y nos no tin ningun duda cu Ysaura cu su amplio trayectoria y experiencia lo sa di hiba Aruba su nomber na halto. Bo tambe por vota pa asina Ysaura por drenta automaticamente den e Top 15! Bay riba nan website www.mrsworld.com y vota pa Aruba, e ta costa $2.50 y tur placa recauda ta bay pa varios instancia caritativo. GLW foundation ta contento cu e plataforma brinda na nos candidatanan pa nan sigui desaroya den e mundo di beyesa.
