E nomber ta perfecto “Paper Sisters” pa un tienda excepcional di e dos rumannan Ras: Mary-Lynn y Julissa. E lugar ta specialisa den ‘stationery’ exclusivo, acesorio pa oficina, productonan di estilo di bida y regalo di calidad impecabel. E storia tipico di exito unda ta inicia chikito na cas pa despues sali na grandi pa complace e demanda di e clientela. Durante 3 aña Mary-Lynn y Julissa a opera un “pop-up store’, cu nan a pone tur nan amor y dedicacion pa awor nan wak e fruto di nan esfuerso. Esaki ta nan prome tienda y nan vision ta pa den futuro habri mas “Paper Sisters” tanto na Aruba como otro parti den e region.
Prome cu a haci e apertura oficial di “Paper Sisters” e mayornan di Mary-Ann y Julissa, a dedica algun palabra bon scogi pa nan yiu muhernan den nan reto nobo. Na nan turno e rumannan a gradici nan famia y amistadnan, cu a apoya nan semper y a yuda nan pa logra nan soño di habri nan prome tienda. Sigur un lugar unda bo lo haya e regalo cu un significacion special pa un ser keri of pa bo mes. Ademas di tin un coleccion unico di producto, nan ta ofrece tambe workshop cu ta involucra creatividad y temanan relaciona cu crecimento personal. Desde diasabra “Paper Sisters” ta habri pa publico na San Barbola 4J, cerca di Watty Vos Boulevard.
