Despues di algun di siman sin tin noticia di nan, e Dukenan di Sussex a sorprende nan fans cu nan Christmas card, cual e protagonista absoluto ta nan yiu Archie. Den e imagen cu e pareha a eligi pa felicita e resto di mundo, nan yiu di shete luna ta aparece dilanti gateando pa e camera mientras su mayornan ta patras sinta riba vloer dilanti un kerstboom. E mensahe cu a post riba e rednan social di monarkia britanico ta bisa: “Merry Christmas and a Happy New Year , from our family to yours”.
Esun encarga pa saca e potret ta un amiga di Meghan, e actriz Janina Gavankar, cu e conoce hopi tempo prome cu prins Harry a cruza den su caminda y su bida a cambia pa semper. Loke no ta confirma si e potret a wordo saca na Canada, unda e pareha a scoge pa disfruta di un descanso bon mereci y aleha poco di e atencion mediatico prome cu cuminsa cu nan agenda oficial na 2020.
No por a falta tampoco e comentarionan unda segun algun supuesto experto, cu e potret ta photoshop door cu e cara di Meghan riba e carchi ta mustra mas gefocus cu e cara di prins Harry, apesar cu ambos ta casi riba mesun distancia tras di Archie. Sin embargo e periodista Nola Thee a post riba Twitter pa defende e imagen cu ta circula, cu e cara di Meghan Markle ta mas enfoca no ta e carchi orgininal pero un potret crea.
