Clawrence House a confirma cu Prince of Wales (71), a test positivo pa COVID-19. Den un comunicado emiti awe, un portavoz a informa: Prince Of Wales a test positivo pa Coronavirus. E tabata mustra sintomanan leve pero fuera di esey e ta mantene den bon estado di salud y ta trahando durante ultimo dianan manera costumber. E Dukesa di Cornwall tambe a haci test pero no tin e virus. Di acuerdo cu e gobierno y conseho medico, e prins y e dukesa ta actualmente den auto-aislamento den nan cas na Escocia.
E testnan a ser realisa pa NHS Aberdeenshire, unda nan ta cumpli cu e criterianan rekeri pa e testnan. Charles ta e prome miembro di e famia real Britanico cu a test positivo pa e virus. Siman pasa a confirma cu Prins Albert di Monaco (62) tin COVID-19, y e corte real Danes a revela cu Prins Henrik, (10) a wordo getest pa detecta e virus, despues di problemanan respiratorio asocia cu bronchitis asmatico. No ta posibel pa determina di ken e Prins a contrae e virus door di e gran cantidad di compromiso, cu el a realisa den su funcion publico durante e ultimo simannan. Prins Charles y su casa Dukesa di Cornwall ta na Birkhall, e lugar faborito di e prins cu tabata un regalo di su mama, Queen Elizabeth. Siman pasa Prins William a comparti un video cu un mensahe personal memey di e crisis di coronavirus, bisando cu ki ora y unda sea tin adversidad, e hendenan di Reino Unido tin e habilidad unico pa uni nan mes. E forma con e comunidadnan ta apoya esunnan afecta ta mustra e miho di nan balornan y naturalesa humano.
